[A:201]པས་གཟིགས་པར་ཞུ་བྱས་པས། དེ་རྒྱལ་པོས་ཁ་ཕྱེས་ནས་གཟིགས་པས་འདི་ལྟར་རོ། ཁྱེད་བལ་པོའི་རྒྱལ་པོ་ལ་ལོངས་སྤྱོད་ཡོད། ང་བོད་མཐའ་འཁོབ་ཀྱི་རྒྱལ་པོ་ལ་དེ་བཞིན་མེད་དེ། རྒྱལ་པོ་ཁྱེད་ནོར་ལོངས་སྤྱོད་ཡོད་པ་ལ་དགའ་ནས་བུ་མོ་སྟེར་ན། ངས་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས། རིན་པོ་ཆེ། གསེར། དངུལ། དར་ཟབ་གོས་དང་རྒྱན། བཟའ་བཏུང་ལ་སོགས་ཀྱི་ལོངས་སྤྱོད་དཔག་ཏུ་མེད་པ་བྱེད་ཅིང༌། ཁྱད་པར་ཕྱོགས་བཞི་ནས་ལས་སྒོ་ཕྱེ་སྟེ། མཐའི་ནོར་ཐམས་ཅད་ངའི་སྒོ་དྲུང་དུ་འོང་ཞིང༌། ལོངས་སྤྱོད་དང་ལྡན་པར་བྱེད་དོ། །དེ་ངོ་མཚར་མི་ཆེའམ། དེ་ལྟར་བྱས་ཀྱང་བུ་མོ་མི་སྟེར་ན། སྤྲུལ་པའི་དམག་ཁྲི་ཕྲག་ལྔ་དེར་བཏང་ནས། ཁྱོད་བསད། ལྷ་གཅིག་ཕྲོགས། གྲོང་ཁྱེར་ཐམས་ཅད་བཅོམ་ལ་བཞག་གོ་བྱ་བ་འདུག་པས། རྒྱལ་པོ་དེའི་ཐུགས་ལ་རྒྱལ་པོ་སྨྲ་བ་ལན་ཅིག་ཡིན་པ༑ དེ་བཞིན་དུ་བདེན་སྲིད་སྙམ་ནས། ཤིན་ཏུ་ཐུགས་མ་བདེ་བར་ལྷ་གཅིག་བོད་ལ་བརྫངས་པར་དམ་བཅས་ཏེ། ཞལ་ངོ་ནག་པར་བཞུགས་པ་དང༌། ལྷ་གཅིག་ན་རེ༑ ཡབ་ཅི་ཉེས་ཞུས་པ་དང༌། ཡབ་རྒྱལ་པོའི་ཞལ་ནས། ཁྱོད་བོད་རྒྱལ་པོའི་བཙུན་མོ་ལ་འགྲོ་དགོས་པར་འདུག་གསུངས་པས། ལྷ་གཅིག་ན་རེ། ཡུལ་ངན་པ་ཆོས་དང་ལོངས་སྤྱོད་མེད་པ་ཕ་མ་དང་མི་འཕྲད་པའི་ས་ཐག་རིང་ས་དེར་མི་འགྲོ་ཟེར་བས། ཡབ་རྒྱལ་པོའི་ཞལ་ནས། ཁྱོད་དེ་སྐད་མ་ཟེར་འགྲོ་དགོས། བོད་ཀྱི་རྒྱལ་པོ་དེ་སྤྲུལ་པའི་རྒྱལ་པོ་མངོན་ཤེས་རྫུ་འཕྲུལ་སྟོབས་དང་ལྡན་པ་ཞིག་ཡོད་པར་འདུག ངས་ཇི་སྐད་སྨྲས་ཀྱང༌། བློན་པོ་དེས་ཡུལ་དུ་མ་ཕྱིན་པར་ཡི་གེར་ལན་ཡོད་གིན་འདུག་པ་ཁྱོད་མི་འགྲོ་བ་དེ་ཤེས་ནས། སྤྲུལ་པའི་དམག་ཁྲི་ཕྲག་ལྔ་འོང་སྟེ། ང་བསད། ཁྱོད་ཕྲོགས། ཡུལ་ཁམས་གྲོང་ཁྱེར་ཐམས་ཅད་འཇོམས་