[A:202]པར་འདུག་པས་འགྲོ་དགོས་གསུངས་སོ། །དེར་ལྷ་གཅིག་གི་བསམ་པ་ལ། ང་རང་གི་ཡུལ་འདི་བཞག་ནས། བོད་མཐའ་འཁོབ་ཡུལ་ངན་པ། ཆོས་མེད་པ། ཕ་མ་དང་མི་འཕྲད་པའི་ས་ཐག་རིང་པོ་དེར་འགྲོ་དགོས་པ། ཡབ་ཀྱི་བཀའ་ནི་བཅག་ཏུ་མེད་བསམས་ནས། ལྷ་གཅིག་གིས་མཆི་མ་བཏོན་ནས། ཡབ་ལ་འདི་སྐད་ཅེས་ཞུས་སོ། །ཀྱེ་མ་ཡབ་གཅིག་རྒྱལ་པོ་ཆེན་པོ་ལགས། ཁ་བ་ཅན་ནི་མཐའ་འཁོབ་ཀླ་ཀློའི་ཡུལ། །དམ་ཆོས་མ་དར་བོད་ཡུལ་མུན་པའི་གླིང༌། །མི་ནི་རིགས་ངན་གདོལ་པ་ཤ་ཟའི་རིགས། །བཀྲེས་ཤིང་དབུལ་བ་ཡི་དྭགས་རྒྱལ་ཁམས་འདྲ། །དེ་འདྲའི་གནས་སུ་བུ་མོ་འགྲོ་དགོས་ན། །ཡབ་ཀྱི་མཆོད་གནས་དགོས་འདོད་འབྱུང་བའི་ལྷ། །མཐོང་ཐོས་དྲན་རེག་ཡོན་ཏན་བསམ་མི་ཁྱབ། །ཇོ་བོ་མི་བསྐྱོད་རྡོ་རྗེ་བདག་ལ་ཞུ། །ཐུབ་པའི་རྒྱལ་ཚབ་བྱམས་མགོན་རིན་པོ་ཆེ། ། མཚན་དཔེས་རབ་བརྒྱན་ཕན་བདེ་འབྱུང་བའི་གཏེར། །བྱམས་པ་ཆོས་ཀྱི་འཁོར་ལོ་བདག་ལ་ཞུ། །ཙནྡན་ཇོ་མོ་སྒྲོལ་མ་ཐུགས་རྗེ་ཅན། །འགལ་རྐྱེན་བར་ཆོད་སེལ་ཕྱིར་བདག་ལ་ཞུ། །རིན་ཆེན་སྟག་ཤ་དེ་དང་རཏྣ་དེ། །བོད་ཡུལ་དབུལ་བ་སེལ་ཕྱིར་བདག་ལ་ཞུ། །རིན་ཆེན་འདོད་རྒུ་འབྱུང་བའི་ལོངས་སྤྱོད་དང༌། །ཟས་སྐོམ་བདུད་རྩིའི་དཔལ་ལ་སྤྱོད་པའི་གཞི། །བཻཌཱུརྱ་ཡི་ལྷུང་བཟེད་བདག་ལ་ཞུ། ཁ་བ་ཅན་ནི་བཀྲེས་ཤིང་སྐོམ་པའི་གནས། །རིན་ཆེན་བང་མཛོད་མང་པོ་བདག་ལ་ཞུ། ཁ་བ་ཅན་ནི་བསིལ་ཞིང་གྲང་བའི་ཡུལ། །ཚེ་གཅིག་དྲོས་པའི་གོས་ཀྱང་བདག་ལ་ཞུ། །དེ་ལྟར་མཐའ་འཁོབ་བོད་ཀྱི་རྒྱལ་ཁམས་དེར། །བདག་གི་སྤྱོད་ལམ་བྱ་བ་ཇི་ལྟར་བྱ། །ཡབ་གཅིག་རྒྱལ་པོས་བདག་ལ་བཀའ་སྩོལ་ཅིག །ཅེས་གདུང་བའི་སྐད་ཀྱིས་མཆི་མ་ཕྱུང་ནས་ཞུས་པས། ཡབ་ཀྱིས་ཐུགས་ཀྱི་དཀྱིལ་དུ་