[A:203]བརྩེ་བའི་ཚིག་ཕྱུང་ནས་གསུངས་པ། ང་ཡི་སྙིང་དང་འདྲ་བའི་བུ་མོ་ཁྱོད། །བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་ཡས་ཁང༌། །ངོ་མཚར་རྨད་བྱུང་ཕན་བདེ་འབྱུང་བའི་གཞི། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཆེན་སྣ་ཚོགས་འབྱུང༌། །རྐང་བཞི་ཀུན་ཁྱབ་རྩི་ཐོག་མར་ལ་སྤྱོད། །རྒྱལ་པོ་ལྷ་ཡིན་འཁོར་རྣམས་བྱང་ཆུབ་སེམས། །དམ་ཆོས་མེད་ཀྱང་རྒྱལ་པོའི་བཀའ་ཁྲིམས་ཡོད། །དེ་འདྲའི་གནས་སུ་བུ་མོ་ཁྱོད་སོང་ཤིག །བདག་གི་ཡི་དམ་མི་བསྐྱོད་རྡོ་རྗེ་དང༌། །རྗེ་བཙུན་བྱམས་པ་ཆོས་ཀྱི་འཁོར་ལོ་འདི། །འཛམ་བུ་གླིང་པ་ཚེ་ལོ་ཉི་ཁྲིའི་དུས། །རྒྱ་གར་ཆོས་རྒྱལ་ཀྲི་ཀྲིའི་ཐུགས་དམ་དུ། །རིན་ཆེན་སྣ་ཚོགས་འདུས་པའི་ཕུང་པོ་ལ། །སངས་རྒྱས་འོད་སྲུངས་དག་གིས་རབ་གནས་མཛད། །སྤྲུལ་པའི་ལྷ་བཟོས་ལུགས་སུ་བླུགས་པ་ལས། །ཐོག་མར་བྱམས་པ་ཆོས་ཀྱི་འཁོར་ལོ་བཞེངས། །དེ་ཡི་རྗེས་ལ་མི་བསྐྱོད་རྡོ་རྗེ་ནི། །ངོ་མཚར་དཔག་མེད་མཚན་དཔེའི་རྒྱན་གྱིས་སྤྲས། །ཕན་བདེའི་འབྱུང་གནས་དད་ལྡན་རྟེན་དུ་བཞེངས། །མཐོང་ཐོས་དྲན་རེག་ཡོན་ཏན་བསམ་མི་ཁྱབ། །ས་སྟེང་འགྲན་ཟླ་ཀུན་དང་བྲལ་བ་འདི། །མ་འོངས་སེམས་ཅན་བསོད་ནམས་བསག་པའི་ཕྱིར། ། ལྷ་མིའི་སྟོན་པ་ཤཱཀྱའི་རྒྱལ་པོ་དེའི། །དགུང་ལོ་བརྒྱད་པའི་ཚད་དུ་ལུང་བསྟན་མཛད། །དེ་ཡི་དུས་སུ་འོད་ཀྱིས་འཇིག་རྟེན་ཁྱབ། །ལྷ་རྣམས་ཀུན་གྱིས་མེ་ཏོག་ཆར་པ་ཕབ། །དེ་ལྟར་ཡོན་ཏན་ལྡན་པའི་རྟེན་མཆོག་འདི། །བདག་གི་མིག་གི་འབྲས་ལྟར་གཅེས་ན་ཡང༌། །མཛེས་པའི་བུ་མོ་ཁྱོད་ལ་བདག་གིས་བརྫངས། །རྗེ་བཙུན་བྱམས་པ་ཆོས་ཀྱི་འཁོར་ལོ་འདི། །འགྲོ་ཀུན་དགེ་ལ་བཀོད་ཕྱིར་བདག་