[A:202]par 'dug pas 'gro dgos gsungs so/ /der lha gcig gi bsam pa la/ nga rang gi yul 'di bzhag nas/ bod mtha' 'khob yul ngan pa/ chos med pa/ pha ma dang mi 'phrad pa'i sa thag ring po der 'gro dgos pa/ yab kyi bka' ni bcag tu med bsams nas/ lha gcig gis mchi ma bton nas/ yab la 'di skad ces zhus so/ /kye ma yab gcig rgyal po chen po lags/ kha ba can ni mtha' 'khob kla klo'i yul/ /dam chos ma dar bod yul mun pa'i gling / /mi ni rigs ngan gdol pa sha za'i rigs/ /bkres shing dbul ba yi dwags rgyal khams 'dra/ /de 'dra'i gnas su bu mo 'gro dgos na/ /yab kyi mchod gnas dgos 'dod 'byung ba'i lha/ /mthong thos dran reg yon tan bsam mi khyab/ /jo bo mi bskyod rdo rje bdag la zhu/ /thub pa'i rgyal tshab byams mgon rin po che/ / mtshan dpes rab brgyan phan bde 'byung ba'i gter/ /byams pa chos kyi 'khor lo bdag la zhu/ /tsandan jo mo sgrol ma thugs rje can/ /'gal rkyen bar chod sel phyir bdag la zhu/ /rin chen stag sha de dang ratna de/ /bod yul dbul ba sel phyir bdag la zhu/ /rin chen 'dod rgu 'byung ba'i longs spyod dang / /zas skom bdud rtsi'i dpal la spyod pa'i gzhi/ /baiDUrya yi lhung bzed bdag la zhu/ kha ba can ni bkres shing skom pa'i gnas/ /rin chen bang mdzod mang po bdag la zhu/ kha ba can ni bsil zhing grang ba'i yul/ /tshe gcig dros pa'i gos kyang bdag la zhu/ /de ltar mtha' 'khob bod kyi rgyal khams der/ /bdag gi spyod lam bya ba ji ltar bya/ /yab gcig rgyal pos bdag la bka' stsol cig /ces gdung ba'i skad kyis mchi ma phyung nas zhus pas/ yab kyis thugs kyi dkyil du