[A:203]brtse ba'i tshig phyung nas gsungs pa/ nga yi snying dang 'dra ba'i bu mo khyod/ /bod ces bya ba khyad par 'phags pa'i yul/ /ri mtho sa gtsang gangs ri gnyan gyi mgul/ /bsil la mdzes pa lha gnas gzhal yas khang / /ngo mtshar rmad byung phan bde 'byung ba'i gzhi/ /chu bo bzhi 'bab rtsi shing nags kyis mdzes/ /'bru sna lnga 'khrungs rin chen sna tshogs 'byung / /rkang bzhi kun khyab rtsi thog mar la spyod/ /rgyal po lha yin 'khor rnams byang chub sems/ /dam chos med kyang rgyal po'i bka' khrims yod/ /de 'dra'i gnas su bu mo khyod song shig /bdag gi yi dam mi bskyod rdo rje dang / /rje btsun byams pa chos kyi 'khor lo 'di/ /'dzam bu gling pa tshe lo nyi khri'i dus/ /rgya gar chos rgyal kri kri'i thugs dam du/ /rin chen sna tshogs 'dus pa'i phung po la/ /sangs rgyas 'od srungs dag gis rab gnas mdzad/ /sprul pa'i lha bzos lugs su blugs pa las/ /thog mar byams pa chos kyi 'khor lo bzhengs/ /de yi rjes la mi bskyod rdo rje ni/ /ngo mtshar dpag med mtshan dpe'i rgyan gyis spras/ /phan bde'i 'byung gnas dad ldan rten du bzhengs/ /mthong thos dran reg yon tan bsam mi khyab/ /sa steng 'gran zla kun dang bral ba 'di/ /ma 'ongs sems can bsod nams bsag pa'i phyir/ / lha mi'i ston pa shAkya'i rgyal po de'i/ /dgung lo brgyad pa'i tshad du lung bstan mdzad/ /de yi dus su 'od kyis 'jig rten khyab/ /lha rnams kun gyis me tog char pa phab/ /de ltar yon tan ldan pa'i rten mchog 'di/ /bdag gi mig gi 'bras ltar gces na yang / /mdzes pa'i bu mo khyod la bdag gis brdzangs/ /rje btsun byams pa chos kyi 'khor lo 'di/ /'gro kun dge la bkod phyir bdag