[A:204]གིས་བརྫངས། །ཙནྡན་ཇོ་མོ་སྒྲོལ་མ་རང་བྱོན་འདི། །འཇིགས་པ་བརྒྱད་སོགས་བར་དུ་གཅོད་པ་རྣམས། །ཉེ་བར་ཞི་ནས་དགེ་ལེགས་རྒྱས་པའི་ཕྱིར། །མཛེས་པའི་བུ་མོ་ཁྱོད་ལ་བདག་གིས་བརྫངས། །རིན་ཆེན་སྟག་ཤ་དེ་དང་རཏྣ་དེ། ། དབུལ་ཕོངས་སྡུག་བསྔལ་སེལ་ཕྱིར་ཁྱོད་ལ་བསྐུར། །རིན་ཆེན་དགོས་འདོད་འབྱུང་བའི་ལོངས་སྤྱོད་གཏེར། །བཻཌཱུརྱ་ཡི་ལྷུང་བཟེད་ཆེན་པོ་འདི། །ཟས་སྐོམ་བདུད་རྩིའི་ཆར་པ་འབེབས་པ་དང༌། །བཀྲེས་སྐོམ་སྡུག་བསྔལ་སེལ་ཕྱིར་ཁྱོད་ལ་བསྐུར། །རིན་ཆེན་གསེར་དངུལ་དར་ཟབ་རྒྱན་དང་བཅས། །གླང་ཆེན་རྔ་མོ་དྲེལ་དང་བཅས་པའི་ཁལ། །གཞན་ཡང་མཁོ་བའི་ཡོ་བྱད་ཟད་གོས་རྣམས། །གང་ལ་ཅི་འདོད་བུ་མོ་ཁྱོད་ལ་བསྐུར། །རིགས་བཟང་ཡིད་འོང་མཛེས་པའི་བུ་མོ་བཅུ། ཁྱོད་ཀྱི་སྐྱོ་གྲོགས་བྱེད་པའི་འཁོར་དུ་བརྫངས། །ཨེ་མ་འབྲལ་བར་མི་ཕོད་བུ་མོ་ཁྱོད། །གཏམ་གྱི་རྟིང་མ་ཡིན་ནོ་ཡིད་ལ་ཆོངས། ཁ་བ་ཅན་གྱི་རྒྱལ་པོའི་ཕོ་བྲང་དེར། །བློན་པོ་བོད་འབངས་རྣམས་དང་འགྲོགས་པའི་དུས། ཁྱོད་ཀྱི་སྤྱོད་ལམ་བྱ་བ་འདི་བཞིན་གྱིས། །གསུངས་ཏེ། འཇིག་རྟེན་མི་ཆོས་ལ་དགོས་པའི་བསླབ་བྱ་དཔག་ཏུ་མེད་པ་མཛད་དོ། །དེ་ནས་རྒྱལ་པོས་བློན་པོ་རྣམས་ལ་གནང་སྦྱིན་དང༌། དགའ་སྟོན་བསམ་གྱིས་མི་ཁྱབ་པ་མཛད་དོ། །ཇོ་བོ་དང་བྱམས་མགོན་གཉིས་ནི་ཤིང་རྟ་བྱས་ན་ལམ་བགྲོད་པར་དཀའ་བས། ཁལ་གྱི་སྟེང་དུ་བཞུགས་པར་འདོད་པ་ལ། གང་གིས་ཀྱང་མ་ཁྱོག་ནས། སྤྲུལ་པའི་མཛོ་མོ་དཀར་མོ་གཉིས་ཀྱིས་ཁྱོག་པར་གྱུར་ནས། ཇོ་བོ་དང༌། བྱམས་མགོན་གཉིས་མཛོ་མོ་རེའི་སྟེང་དུ་བཞུགས། རིན་པོ་ཆེའི་ཁལ་དུ་མ་དང་བཅས། ལྷ་གཅིག་ཁྲི་བཙུན་ཀྱང་དྲེའུ་དཀར་མོ་གཅིག་ལ་ཆིབས། མཛེས་མའི་བུ་མོ་བཅུ། བོད་བློན་དང་བཅས་པས་བསྐོར་ཏེ་བོད་དུ་