[A:205]ཆས་སོ། །བལ་པོའི་བློན་པོ་འཁོར་གཡོག་རྣམས་ཀྱིས་མང་ཡུལ་གྱི་གྲོང་བར་དུ་སྐྱེལ་ཐུང་བྱས་སོ། །བྲག་དང་ཆུ་འཐབ་པའི་འཕྲང་ལ་ཁལ་རྣམས་ཕོག རིན་པོ་ཆེ་རྣམས་ཕྲེང་སྐྱེད་བྱས། ལྷ་རྣམས་ཞབས་ཐང་དུ་བྱོན་ཀྱང་ཟེར། དེ་ནས་དྲེལ་དང༌། རྔ་མོ། གླང་པོ་ཆེ་སོགས་ལ་ཁལ་བཀལ། ལྷ་རྣམས་རང་རང་གི་ཁལ་ལ་ཆིབས་ནས་བྱོན་ཏེ། བོད་ཀྱི་ཡུལ་དུ་ཆགས་ཕེབས་སོ། །དེར་བོད་བློན་དང་བོད་འབངས་རྣམས་ཀྱིས་རོལ་མོ་དུ་མ་ཐོགས་ཏེ། བསུ་བ་རྒྱ་ཆེན་པོ་བྱས་སོ། །དེ་ནས་རྒྱལ་པོས་དགའ་སྟོན་གྱི་གདན་སར་བྱོན་ཏེ། ལྷ་གཅིག་ཁྲི་བཙུན་དང་མཇལ་བ་ལ་མཐོང་ལུགས་གསུམ་དུ་བྱུང་སྟེ། ཕྱོགས་བཅུའི་དེ་བཞིན་གཤེགས་པ་རྣམས་ཀྱི་སྣང་བ་ལ། རྒྱལ་པོ་དང་བཙུན་མོ་གཉིས་མཛད་པ་བཅུ་གཉིས་ཀྱི་ཚུལ་གྱིས་སེམས་ཅན་གྱི་དོན་བྱེད་པའི་སྣང་བ་བྱུང་ངོ༌། །ས་བཅུའི་བྱང་ཆུབ་སེམས་དཔའ་རྣམས་ཀྱི་སྣང་བ་ལ། འཕགས་པ་སྤྱན་རས་གཟིགས་རྒྱལ་པོ་སྲོང་བཙན་སྒམ་པོའི་སྐུ་སྤྲུལ། ཇོ་མོ་ཁྲོ་གཉེར་ཅན་བལ་མོ་བཟའ་ཁྲི་བཙུན་དུ་སྐུ་སྤྲུལ་ནས། སེམས་ཅན་གྱི་དོན་བྱེད་པའི་སྣང་བ་བྱུང་ངོ༌། །མི་ནག་ཐ་མལ་པ་རྣམས་ཀྱི་སྣང་བ་ལ། རྒྱལ་པོ་དང་བཙུན་མོ་གཉིས་སྐྱེམས་ལ་གསོལ་རེས་བྱེད་པ་དང༌། སྐུད་པ་འཁེལ་རེས་བྱེད་པའི་སྣང་བ་བྱུང་ངོ༌། །དེ་ནས་རྒྱལ་པོ་དང་བཙུན་མོ་གཉིས་བློན་པོའི་ཚོགས་དང་བཅས་པ་ཕོ་བྲང་དུ་བཞུགས་པ་ལ། རྒྱལ་པོ་ནི་ཡི་དམ་ལྷའི་དྲུང་ནས་ཕྱིར་མི་འབྱོན་པར། མཆོད་པ་འབུལ་ཞིང་སྨོན་ལམ་འདེབས་སོ། །དེར་ལྷ་གཅིག་ཁྲི་བཙུན་གྱི་ཐུགས་ཀྱི་དགོངས་པ་ལ། རྒྱལ་པོ་འདི་རིགས་གཟུགས་དཔལ་གྱིས་མཛེས་ཤིང༌། ཡོན་ཏན་དུ་མ་དང་ལྡན་པ་ཞིག་འདུག་པ་ལ། ཕྱི་རོལ་དུ་ཡེ་མི་འབྱོན་པ་འདི། མཐའི་དམག་ལ་འཇིག་པ་ཡིན་ཐག་ཆོད། དེ་ལ་མི་