[A:208]སོ༑ ༑ཉིན་མཚན་དང་ལམ་འཕྲང་གང་དུའང་རྗེ་བཙུན་མ་སྒྲོལ་མ་ལ་གསོལ་བ་འདེབས་གིན་སོང་ཞིག་གསུངས་སོ། །དེ་ནས་མགར་གྱིས་རྒྱལ་པོས་བསྐུར་བ་ཐམས་ཅད་ཁྱེར་ཁལ་རྣམས་དེད། བློན་པོ་རྟ་པ་བརྒྱ་དང་ལྷན་དུ་མེ་ཕོ་སྤྲེའུའི་ལོ་ཟླ་བ་བཞི་པའི་ཚེས་བརྒྱད་སྐར་མ་རྒྱལ་དང་འཛོམ་པར་རྒྱ་ནག་ཏུ་ཆས་སོ། །དེར་རྒྱ་ནག་ཟིམ་ཤིང༌། བཀྲ་ཤིས་ཁྲི་སྒོ། རྒྱ་རྗེ་ཐའི་ཛུང་བཞུགས་པའི་ཕོ་བྲང་གི་སྒོ་དྲུང་དུ་སླེབས་སོ། །དེ་ན་ནི་མི་ཁྱིམ་འབུམ་ཚོ་ཙམ་ཡོད་པ། ལོགས་རེ་ལ་ཉིན་ལམ་རེ་ཡོད་པ་སྒོ་མོ་ཆེ་བཞི་ཡོད་པ། མཐོང་བ་ཙམ་གྱིས་དངངས་ཞིང་འཇིགས་པ་ཞིག་འདུག་གོ །དེར་རྒྱ་གར་ཆོས་ཀྱི་རྒྱལ་པོའི་བློན་པོ་རྟ་པ་བརྒྱ་ཐམ་པ། རྒྱ་མོ་ཀོང་ཇོ་འདོད་པ་ལ་སླེབས་སོ། །གེ་སར་དམག་གི་རྒྱལ་པོའི་བློན་པོ་རྟ་པ་བརྒྱ་ཀོང་ཇོ་འདོད་པ་ལ་སླེབས་སོ། །སྟག་གཟིག་ནོར་གྱི་རྒྱལ་པོའི་བློན་པོ་རྟ་པ་བརྒྱ་ཡང་ཀོང་ཇོ་འདོད་པ་ལ་སླེབས་སོ། །བྷ་ཏ་ཧོར་གྱི་རྒྱལ་པོའི་བློན་པོ་རྟ་པ་བརྒྱ་ཡང་ཀོང་ཇོ་འདོད་པ་ལ་སླེབས་སོ། །མི་རིགས་མི་འདྲ་བའི་གཉེ་བོ་རྟ་པ་ལྔ་བརྒྱ་རྒྱ་རྗེའི་དྲུང་དུ་དུས་གཅིག་ལ་སླེབས་སོ། །དེར་རྒྱ་གར་བ་རྣམས་ཤར་སྒོ་ན་ཡོད། གེ་སར་བ་རྣམས་ལྷོ་སྒོ་ན་ཡོད། །སྟག་གཟིག་པ་རྣམས་ནུབ་སྒོ་ན་ཡོད། ཧོར་རྣམས་བྱང་སྒོ་ན་ཡོད། བོད་བློན་རྣམས་བྱང་ཤར་མཚམས་སུ་བསྡད་དོ། །དེར་བློན་པོ་གཞན་མ་རྣམས་ཀྱིས་ཞུ་རྟེན་ཕུལ་ཏེ་མཇལ་ཕྲད་བྱས་སོ། །བོད་བློན་རྣམས་ཀྱིས་མཇལ་བར་ཞུས་པས། སྒུག་ཏུ་བཅུག ཞག་བདུན་སོང་བ་དང༌། རྒྱལ་པོ་འཁོར་དང་བཅས་པ་ཕོ་བྲང་གི་ཕྱི་རོལ་དུ་བྱོན་པ་ལ། མགར་གྱིས་གསེར་གྱི་དོང་རྩེ་བདུན་པོ་དེ། ཞུ་རྟེན་དུ་ཕུལ། རིན་པོ་ཆེ་བཻཌཱུརྱའི་ཁྲབ་ལ་པདྨ་རཱ་གའི་ཕྲ་བརྒྱབ་པ་རྒྱལ་པོའི་དྲུང་དུ་བཞག་སྟེ། མགར་ན་རེ། རྒྱལ་པོ་ཆེན་པོ་རིན་པོ་ཆེ་