[A:209]བཻཌཱུརྱའི་ཁྲབ་འདི། ཡོན་ཏན་དུ་མ་དང་ལྡན་ཏེ། མི་ནད་ཕྱུགས་ནད་བྱུང་བའི་ཚེ་ཁྲབ་འདི་གོན་ནས་གྲོང་ཁྱེར་ལ་བསྐོར་བ་བྱས་ན་ནད་ཐམས་ཅད་ཞི་བར་འགྱུར། སད་དང་སེར་བ་བྱུང་བའི་ཚེ་འདི་གོན་ནས་ཞིང་བསྐོར་ན། སད་དང་སེར་བ་ཐུབ། འཁྲུག་པ་བྱེད་པའི་ཚེ་འདི་གོན་ན་གཡུལ་ལས་རྒྱལ་བར་འགྱུར་རོ། །འཛམ་བུའི་གླིང་ན་ཁྲབ་འདི་ལ་གོང་ཐང་དཔྱད་པས་མི་ཆོད། འདི་ལྷ་གཅིག་དེའི་རིན་དུ་འབུལ་ལོ། ཁྱེད་ཀྱི་ལྷ་གཅིག་མཛངས་མ་དེ། ངེད་བོད་ཀྱི་རྒྱལ་པོའི་བཙུན་མོ་ལ་གནང་བར་ཞུ་བྱས་པས། རྒྱལ་པོ་དེས་མགར་ལ་མིག་འབུར་ཚུགས་སུ་གཟིགས་ནས། རྒྱལ་པོ་འཁོར་བཅས་ཀྱིས་མི་འོས་པའི་ཁྲེལ་གད་ཆེན་པོས་བགད་དེ། རྒྱལ་པོ་དེའི་ཞལ་ནས་མི་སྲིད་པའི་གཏམ་ཤིན་ཏུ་མཚར་ཆེ། ང་ནི་རྒྱ་ནག་སྤྱི་བོ་རྒྱལ་པོ་ནས་དེང་སང་ཕན་རྒྱལ་བརྒྱུད་མ་ཆད་པ་ཞིག་ཡིན། ཁྱོད་བོད་ཀྱི་རྒྱལ་པོས་ངའི་སྟོབས་དང་མངའ་ཐང་གི་དོད་མི་ཕེར་ཏེ། འོན་ཀྱང་ཁྱེད་རྣམས་ཐག་རིང་ནས་ཕེབས་འདུག ད་ལན་ཕྱིར་ལོག་ལ། ཁྱོད་རང་གི་རྒྱལ་པོ་དེ་ལ་དགེ་བ་བཅུ་དང་ལྡན་པའི་རྒྱལ་ཁྲིམས་འཆའ་ཨེ་ནུས་དྲིས་ལ་ཤོག དེ་ནུས་ན་བུ་མོ་སྟེར། མི་ནུས་ན་མི་སྟེར་གསུངས་པས། བློན་པོ་མགར་ན་རེ། འཕྲིན་རེ་རེ་ལ། རྒྱ་བོད་ཀྱི་བར་ལ་ཕར་འགྲོ་ཚུར་འགྲོ་བྱས་ན། ལྷ་གཅིག་སྤྱན་དྲངས་པའི་ཐབས་མེད། ཁྱེད་ཀྱི་གསུང་དེའི་ལན་དུ། ངེད་བོད་ཀྱི་རྒྱལ་པོས་འདི་བསྐུར་བ་ལགས་ཟེར་ནས། ཤོག་དྲིལ་དང་པོ་དེ་རྒྱལ་པོ་ལ་ཕུལ་བས། རྒྱལ་པོས་ཁ་ཕྱེ་ནས་གཟིགས་པས། མཐིང་ཤོག་ལ་གསེར་གྱིས་བྲིས་པ། རྒྱ་ནག་གི་ཡི་གེར་འདུག་སྟེ། ཁྱེད་རྒྱ་ནག་གི་རྒྱལ་པོ་ལ་ཁྲིམས་ཡོད། ང་བོད་ཀྱི་རྒྱལ་པོ་ལ་ཆོས་ཁྲིམས་མེད་དེ། རྒྱལ་པོ་ཁྱེད་དགེ་བ་བཅུའི་རྒྱལ་ཁྲིམས་ཡོད་པ་ལ་དགྱེས་ནས་བུ་མོ་སྟེར་ན། ངས་སྐུ་