[A:209]baiDUrya'i khrab 'di/ yon tan du ma dang ldan te/ mi nad phyugs nad byung ba'i tshe khrab 'di gon nas grong khyer la bskor ba byas na nad thams cad zhi bar 'gyur/ sad dang ser ba byung ba'i tshe 'di gon nas zhing bskor na/ sad dang ser ba thub/ 'khrug pa byed pa'i tshe 'di gon na g.yul las rgyal bar 'gyur ro/ /'dzam bu'i gling na khrab 'di la gong thang dpyad pas mi chod/ 'di lha gcig de'i rin du 'bul lo/ khyed kyi lha gcig mdzangs ma de/ nged bod kyi rgyal po'i btsun mo la gnang bar zhu byas pas/ rgyal po des mgar la mig 'bur tshugs su gzigs nas/ rgyal po 'khor bcas kyis mi 'os pa'i khrel gad chen pos bgad de/ rgyal po de'i zhal nas mi srid pa'i gtam shin tu mtshar che/ nga ni rgya nag spyi bo rgyal po nas deng sang phan rgyal brgyud ma chad pa zhig yin/ khyod bod kyi rgyal pos nga'i stobs dang mnga' thang gi dod mi pher te/ 'on kyang khyed rnams thag ring nas phebs 'dug da lan phyir log la/ khyod rang gi rgyal po de la dge ba bcu dang ldan pa'i rgyal khrims 'cha' e nus dris la shog de nus na bu mo ster/ mi nus na mi ster gsungs pas/ blon po mgar na re/ 'phrin re re la/ rgya bod kyi bar la phar 'gro tshur 'gro byas na/ lha gcig spyan drangs pa'i thabs med/ khyed kyi gsung de'i lan du/ nged bod kyi rgyal pos 'di bskur ba lags zer nas/ shog dril dang po de rgyal po la phul bas/ rgyal pos kha phye nas gzigs pas/ mthing shog la gser gyis bris pa/ rgya nag gi yi ger 'dug ste/ khyed rgya nag gi rgyal po la khrims yod/ nga bod kyi rgyal po la chos khrims med de/ rgyal po khyed dge ba bcu'i rgyal khrims yod pa la dgyes nas bu mo ster na/ ngas sku