[A:210]ལུས་ཀྱི་བཀོད་པ་ལྔ་སྟོང་དུ་སྤྲུལ་ནས། དགེ་བ་བཅུའི་ཁྲིམས་ཉི་མ་གཅིག་ལ་འཆའ་ནུས་པ་བྱེད་དོ། །དེ་ངོ་མཚར་མི་ཆེའམ། དེ་ལྟར་བྱས་ཀྱང་བུ་མོ་མི་སྟེར་ན། ངས་སྤྲུལ་པའི་དམག་ཁྲི་ཕྲག་ལྔ་བཏང་ནས། ཁྱེད་བསད། ལྷ་གཅིག་ཕྲོགས། ཡུལ་ཁམས་ཐམས་ཅད་བཅོམ་ལ་བཞག་གོ་ཞེས་བྱ་བ་འདུག་པས། རྒྱལ་པོ་དེ་ཤིན་ཏུ་སྐྲག་པར་གྱུར་ཏེ། སྐྲག་ཀྱང་མི་སྐྲག་པ་ལྟར་བྱས་ནས། ཁྱེད་བོད་ཀྱི་རྒྱལ་པོ་དེ་ཁ་ཕོ་ཤིན་ཏུ་ཆེ་བར་འདུག ཁྱེད་བོད་ཀྱི་ཡུལ་ན་གཙུག་ལག་ཁང་བརྩིག་པའི་ནུས་པའི་སྟོབས་ཡོད་དམ་མེད། དེ་བཞིན་ཡོད་ན་བུ་མོ་སྟེར། མེད་ན་མི་སྟེར། ད་ལན་སོང་ལ་དྲིས་ལ་ཤོག་གསུངས་པས། ཡང་མགར་གྱིས་བཀའ་ཤོག་གི་ཤོག་དྲིལ་བར་པ་དེ་རྒྱལ་པོའི་ཕྱག་ཏུ་ཕུལ་ནས། འཕྲིན་རེ་རེ་ལ་བོད་དུ་འགྲོ་བ་མི་འོང་བས། རྒྱལ་པོ་ཁྱེད་ཀྱི་གསུང་དེའི་ལན་འདི་ལགས་པས་གཟིགས་པར་ཞུ་བྱས་པ་དང༌། རྒྱལ་པོས་ཁ་ཕྱེ་ནས་གཟིགས་པས་འདི་ལྟར་རོ། ཁྱེད་རྒྱ་ནག་གི་ཡུལ་ན་ཆོས་དར། གཙུག་ལག་ཁང་བརྩིག་པའི་སྟོབས་ཡོད། ང་བོད་ཀྱི་རྒྱལ་པོ་ལ་གཙུག་ལག་ཁང་བརྩིག་པའི་ནུས་པ་མེད་དེ། རྒྱལ་པོ་ཁྱེད་གཙུག་ལག་ཁང་བརྩིག་པ་ལ་དགྱེས་ནས། ལྷ་གཅིག་སྟེར་ན། ངས་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས། གཙུག་ལག་ཁང་བརྒྱ་རྩ་བརྒྱད་བཞེངས་ལ། སྒོ་ཐམས་ཅད་ཁྱེད་ཀྱི་ཕྱོགས་སུ་བསྟན་ནོ། །དེ་ངོ་མཚར་མི་ཆེའམ། དེ་ལྟར་བྱས་ཀྱང་བུ་མོ་མི་སྟེར་ན། ངས་སྤྲུལ་པའི་དམག་ཁྲི་ཕྲག་ལྔ་བཏང་ནས། ཁྱེད་གསོད། ལྷ་གཅིག་ཕྲོགས། ཡུལ་ཁམས་ཐམས་ཅད་བཅོམ་ལ་བཞག་གི་ཟེར་བ་འདུག་པས། རྒྱལ་པོ་དེ་ཤིན་ཏུ་སྐྲག་པར་གྱུར་ཏོ། །དེར་སྐྲག་ཀྱང་མི་སྐྲག་པ་ཁད་བྱས་ནས། ཁྱོད་ཀྱི་རྒྱལ་པོ་དེ་ཁ་ཕོ་ཤིན་ཏུ་ཆེ་བར་འདུག ཁྱོད་ཀྱི་ཡུལ་ན་འདོད་ཡོན་ལྔ་ལ་ལོངས་སྤྱོད་པ་