[A:128]bsags pa'i rten zhig bstan du gsol zhes gsol ba btab pas/ bcom ldan 'das kyi zhal 'dzum dang bcas pa'i sgo nas 'od zer rnam pa bzhi 'phros te/ gcig lha chen po tshangs pa la phog gcig gza' chen po khyab 'jug la phog gcig lha'i dbang po brgya byin la phog gcig bzo bo bi shwa karma la phog pas/ khong rnams spobs pa bskyed de/ lha chen po tshangs pas thal mo sbyar te gsol ba/ yon tan mtha' yas bsam gyis mi khyab pa'i/ /rgyal ba 'jig rten mgon po thub pa yi/ /rin chen lnga las grub pa'i chos kyi sku/ /dge legs phyogs bcur rgyas phyir bdag gis bzhengs/ /zhes so/ /gza' chen po khyab 'jug gis kyang thal mo sbyar te gsol ba/ rnam dag sku mnga' rkang gnyis gtso bo yi/ /rin chen las grub longs spyod rdzogs pa'i sku/ /gangs can mtsho rgyal 'dod rgu 'byung ba'i gter/ /sems can dbul ba sel phyir bdag gis bzhengs/ /zhes so/ / lha'i dbang po brgya byin gyis thal mo sbyar te gsol ba/ thub pa'i dbang po lha dbang lha yi lha/ /gser gyi lhun po mtshan dpe'i rgyan gyis spras/ /rin chen lnga las grub pa'i sprul pa'i sku/ /'gro kun bsod nams gsog phyir bdag gis bzhengs/ /zhes so/ /lha bzo bi shwa karmas thal mo sbyar te gsol ba/ lha mi'i ston pa shAkya'i rgyal po yis/ /ma 'ongs sems can bsod nams bsags pa'i phyir/ /rin chen lnga las grub pa'i ngo mtshar can/ /sku gsum bzhengs pa'i lha bzo bdag gis bgyid/ /ces zhus so/ /de nas lha chen po tshangs pas bcom ldan 'das kyi chos kyi sku bzhengs pa'i bzo rgyu la/ rin po che indra nI la'i phung po chen po gcig gser sogs zhun ma'i phung po chen po gcig chu shel zhun ma'i