[A:254]
rtags yod tsam la'ang phyag byed par dam bcas pa yin pas de ngo mtshar mi che'am gsungs pas/ sprang ban de langs te bla gos hrul po de dpung pa la gzar nas/ rgyal po khyed sangs rgyas kyi bstan pa la dgongs nas rab tu byung ba la mos gus mdzad de/ bdag sprang ban la phyag mdzad pa de ngo mtshar che ste/ nga'i 'di'ang ngo mtshar mi che'am gsungs nas/ mchod rten rtse lnga de lag pa g.yas pa'i sor mo lnga'i steng du blangs te bskor ba gcig byas so/ /der rgyal po cung zhig skyengs par gyur nas/ dbu'i la thod phud de/ a mi dhe ba'i zhal bstan nas/ khyed kyi de ngo mtshar che ste/ nga'i 'di'ang ngo mtshar mi che'am gsungs pas/ yang sprang ban des brang sgo phye/ mtshon chas brang gshags te/ kun rig rnam par snang mdzad kyi lha thams cad byang khog nang du bzhugs pa bstan nas/ rgyal po khyed la lha gcig las mi 'dug nga la 'di tsam yod/ 'di ngo mtshar mi che'am zer bas/ rgyal po shin tu dgyes shing dad par gyur nas mchod gnas su mdzad do| |der rgyal po'i zhal nas/ rab tu byung ba rnams ni bla gos hrul po'am cha lugs dang spyod lam ci 'dra na'ang / log par lta ba ma byed par mos gus gyis shig dper na 'di lta bu'o zhes zhal gdams so/ /mtha' 'dul yang 'dul gyi lha khang dang / 'phrul snang ra mo che rnams legs par bzhengs pa'i le'u ste bcu bzhi pa'o// //
bco lnga pa/ lha sa gnyis dang / mtha' 'dul yang 'dul gyi gtsug lag khang tshar nas rab tu gnas par mdzad pa'i skor/ de nas khri btsun dang kong jo gnyis kyis gtsug lag khang legs par bzhengs pas yongs su rdzogs par