[A:260]kyis bde legs stsol/ /rnam dag dri ma med pa rgyal ba'i bka'/ /bsdu ba rnam bzhis dam chos rgyas mdzad pa'i/ /rgyal sras gnas brtan rab 'byor la sogs pa'i/ /'phags pa'i nyan thos rnams kyis bde legs stsol/ /gzhan yang phyogs bcu'i zhing khams thams cad na/ /'das dang ma byon da ltar bzhugs pa yi/ /sangs rgyas byang chub sems dpa' thams cad kyis/ /gnas 'dir dbang bskur byin gyis brlab tu gsol/ /zhes gsol ba btab pas/ skad cig nyid la sangs rgyas dang byang chub sems dpa' dang dpa' bo dang dpa' mo/ dam pa chos skyong srung ma dang bcas pa thams cad nyi zer gyi rdul tsam lhags te/ sprin dang na bun bzhin du 'thibs par gyur to/ /de nas sangs rgyas thams cad kyis me tog gtor nas byin gyis brlabs par mdzad/ byang chub sems dpa' rnams kyis bkra shis brjod nas rab tu gnas par mdzad do/ / tshangs pa dang brgya byin la sogs pa'i lha rnams kyis me tog gi char chen po phab cing / lha'i bu dang bu mo rnams kyis kyang gdugs dang / rgyal mtshan dang / ba dan dang / lhab lhub dang / rin po che'i phreng ba la sogs pa'i rgyan du ma dang / lha'i rnga bo che dang / gling bu dang / khar rnga dang / cang te'u dang / rol mo'i tshogs du ma 'khrol zhing / lha'i spos dri zhim po rnams kyang / ma la ya'i rlung dal bus khyer ba ltar phyogs bcur khyab pas dri zhim mo/ /lha'i bu dang bu mo de rnams kyis mgrin gcig tu sgra phyung ste/ sangs rgyas kun gyi dgongs pa gcig bsdus pa'i/ / spyan ras gzigs dbang thugs rje'i bdag nyid can/ /mtha' 'khob yul der bstan pa rgyas bya'i phyir/ /'phags pa khyed ni mi yi bdag por 'khrungs/ /rig