[A:261]gzugs yon tan dpal gyis mngon par mtho/ /srong btsan sgam po sangs rgyas sprul pa'i sku/ /chos rgyal khyed kyi gtsug lag khang gnyis la/ /sangs rgyas rnams kyis rab tu gnas par mdzad/ /byang chub sems dpa' rnams kyis bkra shis brjod/ /lha rnams kun gyis mchod pa rgya chen phul/ /nam mkha' la ni me tog char pa phab/ /bar snang la ni bdug spos sprin bzhin gtibs/ /sa gzhi thams cad rin chen gcal du bkram/ /sangs rgyas bstan pa'i rgyal mtshan legs par btsugs/ /dam pa chos kyi rnga chen dam pa brdung / /de ring mkha' la chos kyi nyi ma shar/ /de ring dpal gyis sgron mes kun la khyab/ /de ring rgyal pos dbang bskur byin rlabs thob/ /nyi ma'i 'od kyis madmo'i kha bye ltar/ /de ring blo yi mun pa rab tu bsal/ /dbul pos nor gyi gter kha rnyed pa bzhin/ / chos rgyal byang chub sems dpa' khyed kyis ni/ /thugs kyi dbang po dga' bdes tshim par mdzod/ /ces zer te mi snang ba gyur to/ /de ltar 'phrul snang gi gtsug lag khang dang / ra mo che'i gtsug lag khang gnyis la/ rab tu gnas pa lhan gcig tu lhun gyis grub par mdzad do/ /tshul de lta bu'i gsal la ngos bzung med pa me long nang gi gzugs brnyan lta bu'am/ chu nang gi zla ba lta bur/ rje blon 'bangs dang bcas pa thams cad kyis mngon sum du mthong bar gyur te/ dga' zhing mgu la yi rangs bar gyur to/ /de ltar dga' ston rgya chen po mdzad nas/ bod 'bangs thams cad dang mthun par/ glu gar la sogs pa ltad mo bsam gyis mi khyab par mdzad do/ /de'i dus su rgyal po dga' ston gyi gdan sar rin po che'i khri steng na bzhugs pa las/ yar la bzhengs te/ tshangs pa'i