[A:268]yul du sleb par 'dod lags zer bas/ rgyal pos khong gnyis kyi thu bar bye ma bre re blugs nas gser 'gyur gyi byin gyis brlabs te/ khong gnyis kyi mgo la phyag bzhag nas yo byad gang yod sngas su chug la/ khyed rang gnyis kyi yul yid la dran pa gyis la nyol cig gsung ngo / /der khong gnyis kyis de ltar byas nas nyal bas gnyid thum pa zhig song ba dang / khong rang gnyis kyi yul na sleb 'dug go /thu ba'i bye ma de gser du song / skye ba phyi mar de gnyis kyis dgra bcom pa'i 'bras bu thob par gyur to/ /de nas sras gung ri gung btsan dgung lo bcu gsum bzhes nas/ rgyal srid bzung btsun mo khab tu bzhes pas/ sras mang srong mang btsan bya ba me pho khyi'i lo la 'khrungs so/ /gung ri gung btsan gyis rgyal srid lo lnga bzung / dgung lo bco brgyad bzhes dus/ po ta la ru sku gshegs so/ /gung ri gung btsan yab kyi gong du 'das/ /de yi bang so don mkhar mda' ru brtsig /gral ni gnam ri srong btsan g.yon na yod/ /ming ni gung chen gung ri lags so skad/ /de nas slar yab rgyal pos rgyal srid bzung ste| bde skyid dang ldan par mdzad do/ /de nas yang rgyal po'i thugs la nga'i ra sa 'phrul snang gi gtsug lag khang dang / rgya stag ra mo che'i gtsug lag khang gnyis la/ sangs rgyas kyi bstan pa ji srid gnas kyi bar du yon tan dpag tu med pa dang ldan dgos te/ rin po che'i gling lta bu sangs rgyas dang byang chub sems dpa' dang / dpa' bo dang / dpa' mo ye shes kyi mkha' 'gro ma re yang tha mal pa'i gzugs su sprul nas rgyun du gnas pa dang / bod yul gyi gtsug lag khang thams cad las mngon par mtho zhing mtha' yas pa'i yon tan du ma