[A:271]du sbas so/ /'di dag ni zur tsam yin gyis/ gter sbas lugs rnams rgyas par shes 'dod na/ rgyal po bka'i thang yig la gzigs shig de nas rgyal po'i zhal nas/ gter 'di rnams sbas pa'i yon tan ni/ nga'i gtsug lag khang 'di la snyan pa dang grags pa ni nyi zlas slebs pa'i gnas su khyab ste/ 'dzam bu gling na 'gran zla dang bral ba yin no/ /gdul bya dang zhabs tog mtha' nas rgyas te/ mtha' mi thams cad dbang du 'dus nas/ dpal 'byor nam mkha' dang mnyam pa yin no/ /ma 'ongs pa'i dus su nga'i dbon sras dang / btsun mo blon po bod 'bangs thams cad kyis gtsug lag khang bzhengs par 'dod na/ nga'i ra sa 'phrul snang gi gtsug lag khang 'dir sa phud dang / rdo phud bskyal nas rab gnas lhun gyis grub cing bdud dang log 'dren gyi bgegs med par bkra shis shing yon tan du ma dang ldan par 'gyur ro zhes gsungs so/ /de nas rgyal pos lha sa ne'u thang du dbon sras mang srong mang btsan gyi dbu la phyag bzhag nas/ spang skong phyag brgya pa dang / mdo padma dkar po dang / dam chos zla ba sgron ma dang / spyan ras gzigs kyi sgrub skor bshad rgyud rnams dang / ma 'ongs pa gab pa mngon du phyung ba dang / lha sar zhabs tog byas pa/ phyag dang mchod pa bskor ba byas pa/ mthong thos dran reg gi yon tan bstan pa/ phyi'i rag gso ba dang / nang gi lha la zhabs tog byas pa la phan yon yod pa rnams legs par gsungs te/ sras kyis yi ger bris nas gnod sbyin khang par gter du sbas so// gzhan yang nga nas gdung rabs lnga pa na/ rgyal po khri dang lde zhes bya ba 'byung ste/ de'i dus su rgya gar nas paNDi ta mang po byon nas dam pa'i chos thams cad