[A:131]nad zhi nas/ bcos ma ma yin pa'i mos gus skye ba/ mthong thos dran reg gi yon tan du ma dang ldan pa/ ston pa dngos kyi sku dang khyad par ma mchis pa'i rten 'di bzhengs su gsol nas lha mi kun gyi dpal du gyur te/ ston pa bcom ldan 'das nyid kyis rab tu gnas par mdzad de/ me tog 'thor zhing byin gyis brlab par mdzad do/ /de nas rten 'di lha rnams kyis spyan drangs te/ lha'i yul du lo brgya phrag gcig bzhugs so/ /yang ye shes kyi mkha' 'gro ma rnams kyis nub phyogs u Dyan gyi yul du gdan drangs te/ der lo lnga brgya phrag gcig bzhugs so/ /de nas yang rdzu 'phrul gyis nam mkha' la byon te/ rgya gar rdo rje gdan du lo lnga brgya phrag gcig bzhugs so/ /de ltar ston pa yang dag par rdzogs pa'i sangs rgyas te/ sku gsum po 'di bzhengs/ mdzad pa yongs su rdzogs nas/ dgongs pa mya ngan las 'das so/ /sangs rgyas mya ngan las 'das nas ring por ma lon pa'i tshe/ yul ma ga dha na/ khyim bdag ma hA pA la zhes pa bram ze yin pa zhig la jo mo ye shes kyi mkha' 'gro ma gcig yod/ de gnyis la bu gsum yod pa las/ bu che ba gnyis ni phyi pa la dga'/ chung ba ni nang pa la rab tu mos te/ phyi nang gi grub mtha' la ma 'chams par/ bu gsum po 'thabs pas/ a ma na re/ khyed gsum po ci la 'thab/ 'khyags na ni ras gos gyon/ ltogs na ni 'bras chan zo zer ba la/ bu chung ba na re/ nged spun gsum phyi nang gi grub mtha' la ma 'chams pa/ phyi nang gnyis gang bzang zer bas/ a ma na re/ 'di nas gangs ri ti se la lha ma hA de ba bzhugs/ der phyi nang gi chos lugs gang bzang 'dri ba la btang gi zer nas/ lham la rkang