[A:132]mgyogs kyi rdzas byugs te bu gsum po la bskon nas btang bas/ bu gsum po skad cig la gangs ti se'i rtser slebs te/ bu mo mdzes ma zhig rin po che'i snod na me tog 'thu gin 'dug pas/ bu mo de la khyod su yin/ me tog 'thu nas ci byed byas pas/ bu mo na re/ nged lha mo u ma de ba'i g.yog mo yin/ me tog 'thus nas tshes bco lnga'i nyin/ 'phags pa dgra bcom pa rnams rdzu 'phrul gyis nam mkha' la gshegs te/ nged kyi pho brang du chos ston la 'byon par yod pas/ de rnams la gtor ba yin zer ro/ /der bu mo de dang 'grogs te/ lha ma hA de ba'i pho brang du phyin pa dang / tshes bco lnga dang dus 'dzoms pas rin po che'i gdan bshams/ 'phags pa dgra bcom pa rnams rdzu 'phrul gyis nam mkha' la byon te/ rin po che'i gdan la bzhugs pa mthong ngo / /de nas lha ma hA de ba dang / lha mo u ma de ba gnyis kyis me tog gtor zhing / chos ston drangs nas smon lam btab bo/ /de nas yang 'phags pa dgra bcom pa rnams ni nam mkha' la gshegs so/ /de nas bu gsum gyis ma hA de ba la phyi nang gnyis chos lugs gang bzang dris pas/ lha ma hA de ba'i zhal nas/ chos lugs nang pa sangs rgyas pa bzang ba yin/ nga yang nang pa sangs rgyas pa la brten nas sangs rgya bar 'dod pa yin/ phyi rol mu stegs pa la gnas skabs kyi bde ba tsam ma gtogs/ mthar thug gi snying po med zer bas khong gsum blo thag chod nas yul du log go /de nas a ma la/ nged gsum po nang pa sangs rgyas pa'i bstan pa la zhugs pa yin byas pas/ a ma na re/ khyed gsum po nang pa'i bstan pa la zhugs pa legs kyis/ khyed gsum pos lha khang re re bzhengs dgos zer ro//