[A:283]'dzin skyong gyis shig nga'i btsun mo dang / blon po bod 'bangs thams cad re zhing ltos pa'i pha ma lta bu gyis la/ phan pa dang bde bas khyab par gyis shig nga nas gdung rabs lnga pa la/ /'jam dpal dbyangs kyi sprul pa ste/ /rgyal po lde zhes bya ba 'byung / /des kyang dam chos rgyas par byed/ /de nas gdung rabs gnyis pa la/ /phyag na rdo rje'i sprul pa ste/ /rgyal po khri zhes bya ba 'byung / /des kyang dam chos rgyas par byed/ /de nas bdud kyi sprul pa ste/ /rgyal po dud 'gro'i ming can 'byung / /
glang dar ma yin/
de yi thugs la gdon gsol nas/ /lha khang sgyel zhing dam chos bsnub/ /sde snod 'dzin pa'i srog kyang gcod/ /chos mdzad thams cad bsad cing bcom/ /glegs bam thams cad me la bsregs/ / sangs rgyas bstan pa'i dkrug shing des/ /bla ma slob dpon bran du bskul/ / rab byung btsun pa chos dang phral/ /dge bshes rnams la shan pa bcol/ / sangs rgyas na bza' chu la bskur/ /rten gsum mchod cha rdo yis brdungs/ / chos kyi ming yang med par byed/ /de nas yer pa'i brag khung na/ /phyag na rdo rje'i sprul pa ste/ /dpal zhes bya ba'i dge slong gis/ /sdig can rgyal po sgrol bar 'gyur/ /de nas lo skor brgyad kyi bar/ /sangs rgyas bstan pa med par gyur/ / e ma sems can snying re rje/ /nga yi yi dam 'di rnams kyang / /gtsug lag khang 'dir gter bzhin sbed/ /de nas lnga brgya tha ma la/ /sangs rgyas bstan pa'i me ro zhig /mdo khams sgang nas longs par 'gyur/ kha ba can pa'i sems can la| |mar me 'chi khar gsal ba bzhin/ /bstan pa dar zhing rgyas par 'gyur/ / dad can mchod pa 'bul ba dang / /phyag 'tshal bskor ba byed par 'gyur/ /