[A:289]bzhud ces lan gsum zer ba la/ yab yum gsum de ltar mdzad/ yi dam la thim pa bshad kyang yid ches mi 'ong bsams te/ 'chad ma shes nas gcig gdong gcig la blta zhing mig hu re lus so/ /der khong gnyis khros te/ rgyal po yab yum gar bzhud lan gsum dris pas mi 'chad par ngan pa khyed gnyis gsod pa yin zer nas ral gri phyung bas/ der mang bza' na re/ rgyal po yab yum sprul pa'i skur 'dug pa/ yab yum gsum ga rang byon bcu gcig zhal gyi thugs kar thim nas bzhud do/ /zer nas ngus pas/ de la yang yid ma ches par dbon sras la zhus pas/ der dbon sras kyis/ dang por zhal gdams rgyas par gsungs pa/ de rjes btsun mo gnyis rgyal po la thim pa/ de nas mes rgyal po yang yi dam gyi thugs kar thim pa sogs rgyas par gsungs pas/ der khong gnyis kyang yid ches so/ /der blon po thon mis rgyal po sprul pa'i skur 'dug pa'i rgyu mtshan/ khra 'brug tu ban sprang la a mi dhe ba'i zhal bstan pa dang / li yul gyi dge tshul gnyis la a mi dhe ba'i zhal bstan pa/ lha sa'i rab gnas mdzad dus rgyal pos gsol ba btab pas/ skad cig la sangs rgyas dang byang chub sems dpa' rnams mngon sum du nam mkha' la byon pa la sogs pa bshad pas/ der thams cad yid ches te/ 'phags pa spyan ras gzigs dngos yin par 'dug pa/ yab yum gsum bzhugs pa'i dus su mos gus chung 'dug zer te/ chos rgyal sprul pa'i sku zer zhing thams cad mya ngan gyis sa la 'gyel lo/ /der yang lha rnams kyis me tog gi char phab ste/ sa yang rnam pa drug tu g.yos so/ /de nas rang byon bcu gcig zhal gyi thugs ka nas 'od zer kha