[A:292]rnams/ /mchod pa'i yo byad bsam gyis mi khyab pa/ /gnas der khyer nas phyag dang mchod pa phul/ /de ltar 'gran med rgyal po'i bang so de/ /yul de'i lha srung rnams la phrin bcol mdzad/ /gsol ba btab nas slar yang yul du byon/ / phan bde'i 'od kyis phyogs bcur khyab par mdzad/ /ces so/ /
bco brgyad pa/ dbon sras mang srong mang btsan gyi skor/ des na dbon sras mang srong mang btsan gyis/ dgung lo bcu gsum lon dus rgyal srid bzung / btsun mo 'bro bza' khri ma lod bya ba khab tu bzhes/ rgyal khams la dbang bsgyur/ 'di'i dus su rgya'i rgyal pos rgyal po srong btsan sgam po mi bzhugs par shes/ mgar gyis rgya yul phung bar byas pa rnams dran nas/ rgya'i dmag 'bum tsho lnga btang nas bod 'joms pa dang / jo bo shAkya gdan 'dren zer ba la sogs kyi gtam byung ba la skrag nas/ jo bo ra mo che nas lha sar gdan drangs/ lho sgo me long can du bzhugs nas/ sgo la zha la bgyis te/ 'jam dbyangs bzhengs so/ /rgyal srid lo bco lnga bzung ste/ dgung lo nyi shu rtsa bdun la gtsang gi bar snang sgang du 'das so/ /mang srong bang so de yi g.yon na yod/ /bang so de yang rin chen nor gyis bkang / /ming ni sngo gzhe hral po zer ba lags/ /
bcu dgu pa/ 'dul srong mang po rje rlung nam 'phrul gyi skor/ mang srong mang btsan gyi sras la/ 'dul srong mang po rje rlung nam 'phrul gyi rgyal po yin te/ yab 'das zhag bdun lon dus chu pho byi ba la sgrag phu ru 'khrungs/ mgar gyi sras gnya' btsan ldem bu dang / stag ra khong lod gnyis kyis blon po byas nas rgyal khams la dbang bsgyur/ mchims bza' btsun mo tog bya ba khab tu bzhes/