[A:295]bod du 'gro bar mos so/ /der yang rgyal po des rdzongs dpag tu med pa bskur/ rgyal po yang 'khor mang po dang bcas pa bu mo sems la 'phreng bas/ zhing pheng hen zer ba'i mkhar rtsig chen po gcig yod pa'i sa cha bar du skyel thung mdzad do| |der gur chen po phub cing / bod kyi gser yig pa rnams la ston mo chen po byas te/ rgyal po'ang spyan chab mang po phyung nas/ sras mo la bslab bya mang po mdzad/ mkhar de la gtogs pa'i nyes pa can thams cad thar du bcug go /lo gcig gi bar la dmag dang 'dab nor thams cad med par mdzad de/ mkhar de'i ming kyim shing hen bya bar btags so/ /de nas blon po che ba gnyis dmag dang bcas pa'i skyel ma btang ste bod du 'ongs so/ /der rgya bod kyi mtshams su sleb pa dang / bod du blon po rnams kyis rgyal bu gdan drangs te/ mtshan mo zla ba'i 'od la thams cad kyis rta rgyugs pa la der rgyal bus kyang rta rgyugs pas/ rtas bskyur te 'das so/ /de ltar btsun mo sleb khar/ rgyal bu grongs nas thams cad mya ngan gyis non no/ /ljang tsha lha dbon bang so mes kyi mdun/ /zlum por brtsigs nas gter yang sbas so skad/ /de nas kong jo dpon g.yog rnams kyis/ rgya bod kyi mtshams su slebs pa dang / kong jo la glo bur du snying la mda' phog pa'i sdug bsngal 'dra ba zhig byung nas/ de ma khad me long phyis nas bltas pas/ sngar gyi rgyal bu gzugs byad mdzes pa de med par rgad po bzhin mi sdug pa byad spus khengs pa zhig 'dug nas shin tu yi mug par gyur te 'di skad zer ro| |me long gi brda chad mthong ba na/ /bu mo'i snying la gcong cig zhugs/ /rang yul du log pa shul thag ring / /bu mo'i pha ming snying ring po/ /bod du 'gro ba'i