[A:134]nad sos par 'gyur ro/ /mi rnams 'thab rtsod kyi zhe sdang rab tu 'bar bar gyur na yang / rten de'i zhal mthong ba tsam gyis zhe sdang rab tu zhi nas snying rje byang chub kyi sems dang ldan par 'gyur ro/ /de nas a mas ji ltar gsungs pa bzhin du/ de'i sang a ma mya ngan las 'das so/ /zhag gcig ma thim pa la skyon ci byung bltas pas/ zhabs g.yas pa'i mthe'u chung ma thim par 'dug go /de ltar sku 'di dang jo bo shAkya rnam gnyis rgya gar rdo rje gdan na bzhugs pa las/ de nas rgyal brgyud mang po zhig 'das pa'i tshe/ rgya gar na chos rgyal dharma pA la bzhugs so/ /de dang dus mnyam du rgya nag na rgya rje spri sti ma dza ya bya ba yod pa la| rgya gar gyi rgyal po dang / rgya nag gi rgyal po gnyis ma mthong ma 'phrad pa'i grogs po byas so/ /der rgya nag gi rgyal pos rgya gar gyi rgyal po la skyes gsum bskur ba'i tha ma la/ za 'og gi gos srub med pa dpal gyi be'u bzhi snying gar spungs 'ong ba zhig bskur byung bas/ rgya gar gyi rgyal po'i thugs la/ rgya nag gi rgyal po de la 'dod pa chen po yod par 'dug ci 'dod dam snyam mo/ /de nas yi ge gcig bskur byung bas kha phyes pas 'di ltar ro/ /rgya gar chos skyong rgyal po bstan pa'i bdag /sngon bsags bsod nams 'bras bu thob pa'i mthus/ / mnga' thang dpal 'byor dpag med chos kyi gter/ /'dod rgu'i longs spyod mnga' zhabs phan bdes bskyong / /yul las khyad 'phags rgya gar yul du bzhugs/ /bsod nams bsags pas rten gyis 'phangs pa med/ /bdag cag mtha' 'khob rgya nag rgyal po nga / /rgyal ba'i bka' med ston pa'i sku med cing / / bdag gi yul na chos kyi skabs med pas/ khyed kyis bdag la bcom ldan