[A:135]'das kyi sku/ /dgung lo bcu gnyis bzhes pa'i sku tshad dang / /mdo lnga dag dang dge slong bzhi grwa gcig /brtse bas bdag la gnang bar mdzad du gsol/ / zer bar 'dug pas/ der rgyal po'i thugs la nga'i yul na theg pa chen po'i chos yod/ sangs rgyas kyi sku gdung ring bsrel dang / nyan thos dgra bcom pa yang bzhugs/ kho'i yul na de rnams med pas/ nga'i yul 'dir chos mi nub cing / kho'i yul der chos dar 'ong thag chod pas/ jo bo rang la gsol ba btab la bskur dgos bsams te/ pho brang du jo bo'i drung du byon pa dang / jo bo zhal lhor gzigs bzhugs pa de/ shar la gzigs 'dug pas/ 'di snyam du sems te/ rgya nag tu 'byon pa la jo bo rang kyang thugs dgyes par 'dug go snyam mo/ /de nas gzings chen po cig byas de'i steng du jo bo shAkya dang / dkon mchog gsum bzhugs/ gzings kyi steng du dar dang rin po che'i gur phub/ rol mo dang dar po che la sogs pa dpag tu med pa byas te/ rgya gar nas rgya nag tu 'bab pa'i chu chen po zhig yod pa de la gzings btang nas/ rgyal pos lan mdzad pa/ kye ma rgya nag rgyal po gsan mdzod cig /bdag gi mchod gnas ston pa'i zhal skyin 'di/ /yon bdag lha dbang brgya byin khong gis mdzad/ /rgyu ni rin chen rnam pa bcu las grub/ /'di'i bzo bo bi shwa karmas mdzad/ /rab gnas sangs rgyas nyid kyis mdzad pa lags/ /de ltar 'gran med rgyal ba'i dbang po 'di/ /mthong thos dran reg gsol ba btab gyur pas/ /sangs rgyas myur du thob par rgyal bas gsungs/ /de ltar yon tan ldan pa'i jo bo 'di/ / bdag gi lus kyi snying ltar gces na yang / khyed kyi skyes dang bka' stsal lci ba