[A:321]gtsug lag khang rnams la zhabs tog rgyas par mdzad do/ /rgyal po de dgung lo lnga bcu nga lnga bzhes dus/ me mo bya lo la sgrags kyi phur 'das so/ /de yi bang so 'phrul rgyal g.yon na yod/ /bang so de yang rin chen nor gyis bkang / /yum gyi chab gang bskang pas mtho ba yin/ /ming ni rgyal chen bang so zer ro skad/ /zhes zer ro/ /
nyer lnga pa/ der sras che ba gtsang ma ni chos la dga' ste rab tu byung / dar ma ni sdig la dga' ste rje'i 'os min/ bar pa ral pa can la srid gtad do/ /rgyal po mnga' bdag ral pa can de/ me pho khyi la sku 'khrungs/ dgung lo bcu gnyis la yab 'das te/ rgyal sar bton/ bka'i blon po bran kha dpal gyi yon tan gyis byas/ rgyal khams la dbang bsgyur/ btsun mo cog ro bza' dpal gyi ngang tshul la sogs pa btsun mo che chung lnga khab tu bzhes/ dge ba bcu'i khrims bzung / rgya gar gyi paNDi ta dzi na mi tra/ shI landra bo dhi/ dA na shI la la sogs pa spyan drangs/ lo tsA ba ka ba dpal brtsegs/ cog ro klu'i rgyal mtshan/ bande ye shes sde rnams kyis chos bsgyur te/ chos thams cad skad gsar bcad kyis gtan la phab/ bka' bcad rnam pa gsum du mdzad do/ /tha na bre srang / zho la sogs pa thams cad kyang rgya gar dang bstun/ thos bsam sgom gsum gyi sgom grwa btsugs/ 'chad rtsod rtsom gsum gyi bshad grwa btsugs/ chos sde sum cu tham par dge 'dun gyi sde btsugs/ mkhas btsun bzang gsum gyi 'dul grwa btsugs/ rab tu byung ba re re'i zhabs tog la 'bangs mi khyim bdun phul/ rgyal po gung la bzhugs pa la/ dbu'i ral pa g.yas g.yon gyi sne la dar