[A:152] mtha' 'khob 'dul ba'i gnyen po yin/ kha ba can pa'i chos skal yin/ /mdo rgyud bstan bcos du ma dang / /thos bsam sgom gsum thams cad kyi/ /snying po gcig tu bsdus pa'i bcud/ /gcig chog rgyal po rin po che/ /yi ge drug pa 'di zlos shig /gzungs sngags 'di yi byin rlabs kyis/ kha ba can gyi mtha' 'khob der/ /sems can smin grol lam la 'khod/ /dam chos dar zhing rgyas par 'gyur/ /zhes lung bstan to/ /'phags pa padma la 'khrungs pa las/ yi ge drug pa'i phan yon bstan pa'i le'u ste bzhi pa'o// //
lnga pa/ 'phags pa spyan ras gzigs kyis kha ba can pa'i sems can rnams smin grol la bkod pa'i skor/ de nas 'phags pa spyan ras gzigs kyis/ kha ba can pa'i sems can rnams kyi don la dgongs nas/ sangs rgyas snang ba mtha' yas kyi drung du/ byang chub tu thugs bskyed nas/ pus mo g.yas pa'i lha nga sa la btsug ste thal mo sbyar nas/ smon lam btab ste/ bdag gis khams gsum rigs drug gi sems can thams cad bde ba la 'god par gyur cig khyad par du bod kha ba can gyi sems can thams cad bde ba'i lam la 'god par gyur cig bdag gis sems can 'dul dka' ba de rnams thar pa byang chub kyi lam la ma 'khod kyi bar du/ rang ngal zhing dub nas zhi bde'i bsam pa skad cig kyang mi skye bar gyur cig gal te skyes pa na nga'i mgo 'di ardza ka'i dog pa ltar tshal pa bcur 'gas shing / lus po yang padma'i 'dab ma bzhin du dum bu stong du bye bar gyur cig ces brjod nas/ dmyal ba'i gnas su byon/ yi ge drug pa'i chos bshad phan pa dang bde ba la bkod/ dmyal ba tsha