[A:154] spyan chab shor ro/ /de yang spyan g.yas pa nas mchi ma zhig thang la lhung bas jo mo khro gnyer can du gyur te/ rigs kyi bu khyod kha ba can pa'i sems can gyi don byed pa la sdug bsngal bar ma byed cig kho mos kyang sems can gyi don byed pa'i grogs byed gsungs te/ spyan g.yas pa la thim par gyur pa de ni phyi ma'i dus kyi bal mo bza' khri btsun yin no/ /yang spyan g.yon pa nas mchi ma zhig thang la lhung bas jo mo sgrol mar gyur/ rigs kyi bu khyod kha ba can pa'i sems can gyi don byed pa la sdug bsngal bar ma byed cig kho mos kyang khyod kyis sems can gyi don byed pa'i grogs bgyi'o gsungs te/ spyan g.yon pa la thim par gyur to/ /de ni phyi ma'i dus kyi rgya mo kong jo 'di yin no/ /de nas 'phags pas mtsho 'gram du byon te/ yi ge drug pa'i chos bshad nas/ snying rje tshad med pas bden pa'i tshig don brjod pa/ thog med dus nas las ngan bsags pa'i mthus/ /gting mtha' med pa'i dmyal ba chen po 'dir/ /bzod dka'i sdug bsngal du mas gtses pa rnams/ /rnam grol thar pa'i gling la 'khod par shog / dug mtsho khol ma'i nang du 'tshod byed cing / /dmyal ba'i me yis rtag tu bsreg byed pa/ /skyabs med nyam thag smre sngags 'don pa rnams/ /phan bde'i char gyis rtag tu bsil bar shog /tsha grang bkres skom du mas gzir ba yi/ khri phrag du ma mtsho 'dir gnas pa rnams/ /lus 'di bor nas bdag gi zhing khams su// rigs bzang chos ldan rnams su skye bar shog /oM ma Ni padme hU~M/ zhes gsungs pas/ sems can dmyal ba po de rnams tsha grang gi sdug bsngal zhi nas/ lus bde ba dang ldan/ sems sdug bsngal dang bral nas/ thar pa byang chub kyi lam