[A:167]ring ba/ dad pa che ba/ snying rje che la brtson 'grus che ba/ dge ba la dga' ba/ tshig 'jam pa/ smra mkhas pa de ni pha'i rigs so/ /ma brag srin mo'i rigs su gyur pa ni/ 'dod chags dang zhe sdang che ba/ tshong dang khe spog la sems pa/ blo 'dod dang 'gran sems che ba/ gad mo cher dgod pa/ lus stobs dang snying stobs che ba/ spyod pas skad cig kyang mi tshugs pa/ blo sna mang ba/ byed skyen pa/ dug lnga rgyas pa/ gzhan gyi skyon thos na dga'/ khro gtum pa de ni ma'i rigs so// de'i dus der ri rnams ni shing nags su song / klung thams cad ni chus khengs yod pa/ kong chu lag kha phye nas/ chu thams cad der song ste/ kong chu lag tu thim mo/ /de nas thang thams cad la zhing byas/ grong khyer mang po brtsigs/ de nas ring por ma lon par/ rje gnya' khri btsan po bod kyi rgyal po la byon nas/ rje dang 'bangs su bcos skad do/ /bod kyi mi brgyud spre'u dang brag srin mo nas chad pa'i le'u ste bdun pa'o// //
brgyad pa/ bod rgyal po'i gdung rabs dang po ji ltar byon pa bstan pa'i skor/ de nas bod rgyal po'i gdung rabs rim par byon pa rnams bshad par bya ste| de'ang / gnam la khri bdun/ stod kyi steng gnyis/ bar du legs drug sa la sde brgyad/ 'og gi btsan gsum zhes pa ltar/ rje gnya' khri btsan po nas/ re re nas bgrang ba'i gdung rabs nyi shu rtsa bdun na/ 'phags pa kun tu bzang po'i sprul pa lha tho tho ri snyan shal byon te/ sangs rgyas kyi bstan pa dbu brnyes pa yin no/ /de'ang / bka' chems ka khol ma las/ rgya gar gyi rgyal po shAkya ri brag pa'i gdung brgyud chos rgyal mya ngan med nas rim par byon pa/ rgyal po