[A:190]gcig tu rgyal po la 'di skad ces zhus so/ /sprul pa'i rgyal po byang chub sems// mgo nag yongs kyi rje khyed kyis/ /mos gus bsod nams bsags pa'i rten/ / yi dam lha gcig spyan 'dren na/ /rgya gar yul gyi lho phyogs su/ /singga la yi rgya mtsho'i 'gram/ /rang byon kharsa pa Ni'i rgyab/ /glang chen nyal ba'i bye ma'i 'og / tsandan sbrul gyi snying po las/ /grub pa'i rang byon spyan ras gzigs/ /ngo mtshar can zhig de na bzhugs/ /de ni rgyal po'i yi dam yin/ /zhes zer te/ mi snang bar gyur to/ /de nas rgyal po'i thugs kyi dgongs pa la/ yi dam gyi lha de spyan 'dren pa la/ mis mi rnyed pas/ sprul pa zhig btang dgos dgongs pa dang / de ma thag tu rgyal po'i smin mtshams kyi mdzod spu nas/ sprul pa'i dge slong a ka ra ma ti shI la zhes pa/ dbu la sangs rgyas 'od dpag med bzhugs pa zhig sprul nas/ yi dam de spyan 'dren pa la btang ngo / /de nas sprul pa'i dge slong des/ rdzu 'phrul gyis rgya gar lho phyogs su byon pa dang / grong khyer dbus 'gyur bya bar slebs te/ de na rgyal po utpal ge sar zhes pa/ rgyal po de gdung brgyud nang pa sangs rgyas pa yin pa la/ phyis phyi pa mu stegs pa'i chos lugs bzung nas/ nyin re la ra lnga lnga bsad nas/ dbang phyug chen po'i rten la mchod do/ /rgyal po'i pho brang de'i g.yon na/ sngon sangs rgyas 'khor ba 'jig gis rab gnas mdzad pa'i mchod rten padma'i 'khor lo can bya ba bzhugs so/ /der sprul pa'i dge slong des/ mchod rten de'i bum pa'i thad kyi nam mkha' la skyil krung mdzad cing bskor ba mdzad pas/ rgyal po'i pho brang gi yang thog nas gzigs pas ngo mtshar du gyur nas/ rgyal pos sprul pa'i dge slong de pho brang du gdan drangs pa