[A:96]bya slu ba'i rdzun dang / phra ma sogs lta ga la zhig ste gsung la skyon gyi go skabs med do/ /de bzhin du da lan gyi sku dang gsung gi rnam thar rig byed 'di ni rang phyogs la chags pa dang / gzhan phyogs la sdang bas kun nas slang ngo snyam pa'am/ 'di ni nga rgyal dang rlom sems dang dregs pa dang rgyags pa dang bag med pas kun nas slong ba'i mtshan ma cung zad do snyam pa la sogs pa rnams/ lo mang po'i bar du legs par bltas kyang lan gcig tsam yang ma mthong bas/ thugs kyi 'khrul pa zad pa ste/ mdor na blo gros dang ldan zhing / gzu bor gnas la/ blun dad med pa zhig gis legs par brtag na/ shes nas dad pa'i mchog thob par gdon mi za bas bstod pa yang 'di nyid phul du byung ba yin te/ bstod pa brgya lnga bcu pa las/ bcom ldan 'das kyi sku dang ni/ /gsung dang thugs kyi 'phrin las la/ /zhe 'dras gyur pa gang gis kyang / /chos dang ldan par glags mi rnyed/ /ces gsungs pa bzhin no/ /
gnyis pa la gsum las/ so thar sdom pa'i yon tan rdzogs tshul ni/ bstan pa'i rtsa ba tshangs spyod kun gyi mchog/so so thar pa'i dgag sgrub gnang gsum gyi/ /bslab pa'i gnas la mkhas shing mi 'da' bas/ /dgra bcom 'dul ba 'dzin la gsol ba 'debs/ /zhes pa ste/ so sor thar pa 'di ni| bstan pa'i rtsa ba yin te/ mdo dang lung las bstan pa'i gnas tshad lo lnga stong la sogs pa gsungs pa thams cad/ 'di'i dge slong gi sdom pa gsar du skye ba yod med kho na la bya dgos pa'i phyir te/ gzhan du lung rtogs gzhan yod pa tsam gyis byed na/ sdom pa gsum ka dang ldan pa'i skyes chen sku tshe byin gyis