[A:97]brlabs nas bzhugs pa du ma yod pa'i phyir ro/ /de ltar na phyi nang gi tshangs par spyod pa thams cad kyi mchog tu gyur pa yin te nges par 'byung pa'i tshul khrims yin pa'i phyir ro/ /don 'di la dgongs nas 'di nyid chos rje rnam gsum gyis rtsal du ston pa bzhin du/ bdag nyid chen po 'dis kyang legs par thugs nyams su bzhes te/ bshad ma thag pa ltar mi mthun phyogs mtha' dag gis ma gos shing / gso sbyong dang dbyar gnas dang dgag dbye ste/ gzhi gsum gyi phyag len la yang shin tu gces spras su mdzad do/ /mdor na dgag pa dang sgrub pa dang gnang ba gsum gyis bsdus pa'i bcas mtshams phra mo rnams kyang mdo rtsa ba'i tshig don thugs la legs par mnga' ba'i sgo nas shin tu nges shing | nges pa de nyid kyi sgo nas bcas pa dang rang bzhin gyi bslab gzhi phra zhing phra ba rnams las kyang ma 'das par thugs nyams su bzhes nas/ mdau rtsa ba'i bshad pa tshar mang du gnang / bdag gis kyang rgya cher 'grel gyi steng nas tshar gcig thos/ de bzhin du/ chos rje seng ge'i mtshan can bzhugs ring phal cher rab byung bsnyen rdzogs kyi slob dpon mdzad de/ bu ston rin po che'i las chog chen mo shin tu byang bar rgyun du thugs la bzhugs pa'i sgo nas tshig phyed kyang ma 'khrul bar gsung pas gdul bya mtha' yas pa'i rgyud la so thar gong 'og rnams legs par bskyed do/ /gshegs rjes mkhan po mdzad nas mkhan po'i bya ba rnams 'khrul pa dang bral bar mdzad pas kyang de bzhin te/ rje yab sras 'di pa'i phyag len khyad par can 'di rgyus yod nas/ gzhan gyi las gral mthong pa'i tshe/ rang gi bla ma la dad pa mchog tu skye'o/