[A:128]gshegs bshul du nye'u mi bgrod cing / glang po chen po'i khal be'us 'khur bar mi nus so zhes yul gzhan du 'bros pa dang shad kyis sbyang pa la sogs pa mdzad cing | 'phral du/ bdag nyid chen po 'di bas mkhas par rlom pa dang che bar rlom pa yang du mar yod kyang / sngon gyi dus su khu ston chen po dang / rngog legs pa'i shes rab dang / lo tsha ba nag tsho dang / rong pa dge ba la sogs pa chen po dang dregs pa can du ma yod kyang / jo bo chen po'i chos kyi rgyal srid ston pa rin po che la gtad pa ji bzhin du rang gzhan sus kyang zlog par ma nus par/ chos kyi rgyal po chen po'i bka'i cod pan spyi bor blangs te/ chab 'og mtha' dag la bka'i 'khor lo legs par bskor nas/ ma rgyal ba las rgyal ba dang rgyal ba gnal du 'god pa dang / tshar gcad dang rjes su bzung ba la sogs pa'i bka' khrims kyi rnga bo che chen po brdungs shing / chos kyi rgya mtshan chen po lhag par bgrengsgreng ba la brtson par gyur ro/ /de yang lo gnyis kyi bar du/ rdzong kha chos sde dang ri khud chos sde gnyis kar bzung nas gnyis ka'i dge 'dun gyi sde skyong pa dang gdul bya rnams la gang la gang 'dul gyi chos 'chad pa dang gdams pa dang rjes su bstan pa tshim par mdzad cing rod du rung ba'i skya ser du ma la dbang bkur ba dang lung 'bogs pa dang man ngag sbyin pa dang / bdag nyid kyang bsnyen pa dang sgrub pa dang de dag gi kha skong dang bar chad zhi ba dang sogs pa'i ched du gar phebs su sbyin sreg gi cho ga khyad par can mdzad pa la sogs pas dus 'da' bar mdzad cing / de nas/ chu pho rta'i lo la/ chos rje lo chen/ gnam rtse ldeng gi dbyar gnas chos 'khor chen mo la thegs rjes/