གང་གིས་སྔགས་ཀྱི་ཐེག་པ་མི་ཤེས་པ་དེ་ཐམས་ཅད་ནི་འཁོར་བ་པ་སྟེ་བཅོམ་ལྡན་འདས་རྡོ་རྗེ་འཛིན་པའི་ལམ་དང་བྲལ་བའོ།། དེ་ལྟ་བས་ན་མཆོག་གི་དང་པོའི་སངས་རྒྱས་ནི་བླ་མ་དམ་པ་རྣམས་ཀྱིས་བསྟན་པར་བྱ་ཞིང་། ཐར་པ་དོན་དུ་གཉེར་བའི་སློབ་མ་དམ་པ་རྣམས་ཀྱིས་མཉན་པར་བྱའོ།། ཞེས་པའི་སཾ་སྐྲྀ་ཏ་བྲིས་པ། དེར་གནས་པའི་པཎྜི་ཏ་ལྔ་བརྒྱ་ཙམ་གྱིས་གཟིགས་པས། ཐུགས་སུ་མ་ཤོང་སྟེ་བརྩད་པས། ཆོས་ཀྱི་རང་བཞིན་ཟབ་ཅིང་རྒྱ་ཆེ་བས་ཐམས་ཅད་ཡིད་མགུ་ནས་སློབ་མར་གྱུར་ཏེ། དུས་ཀྱི་འཁོར་ལོས་ཐོག་དྲངས་པའི་སེམས་འགྲེལ་རྣམས་གསན་ཏོ།། དེ་རྣམས་ཀྱི་ནང་ནས་མཆོག་ཏུ་གྱུར་པ་མཉྫུ་ཀཱིཪྟི་དང་། འདའ་བྱང་ཆུབ་སེམས་དཔའ་དང་། པཎྜི་ཏ་རི་བོ་པ་དང་། ཤཱནྟ་གུབྟ་དང་། ཨ་བྷི་ཡུཀ་ཏ་དང་། ཨ་བྷ་ཡཱ་ཀ་ར་གུབྟ་དང་། པུཎྱ་ཆེན་པོ་དང་། ཁ་ཆེ་གམ་བྷཱི་ར་དང་། གུ་ཎ་རཀྵི་ཏ་དང་། སོ་མ་ནཱ་ཐ་དང་། ཙ་མི་ལ་སོགས་པའི་མཁས་པ་མང་དུ་བྱུང་ནས་ཤིན་ཏུ་དར་བར་གྱུར་ཏོ།། དེ་ནས་བལ་པོ་ཡེ་རང་གི་པཎྜི་ཏ་ས་མནྟ་ཤྲཱི་བྷ་དྲས་མཁས་པ་ལྔ་ལ་གསན་ཅིང་། གཙོ་བོར་མཉྫུ་ཀཱིཪྟིའི་རྗེས་སུ་འབྲང་ངོ་།།
རྭ་ཆོས་རབ།
དེ་ལ་སྙ་ནམ་སྣང་ཡུལ་དུ་སྐུ་འཁྲུངས་པའི་རྭ་ལོ་ཙཱ་བ་རྡོ་རྗེ་གྲགས་ཀྱི་དབོན་པོ་རྭ་ཆོས་རབ་ཀྱིས། འཇིགས་བྱེད། དགྲ་ནག གདོང་དྲུག་པ་སྟེ་ནག་པོ་སྐོར་གསུམ། ཧེ་རུ་ཀ་མངོན་འབྱུང་། ཕག་མོ་མངོན་འབྱུང་། མགོན་པོ་མངོན་འབྱུང་སྟེ། མངོན་འབྱུང་གསུམ་དང་། ཨ་བྷི་དྷཱ་ན་དང་། སཾ་པུ་ཊི་རྣམས་དང་། ཆོས་ཆུང་དྲུག་ལ་སོགས་པ་རྣམས་ཐུགས་སུ་ཆུད་ནས། དུས་ཀྱི་འཁོར་ལོ་གསན་པར་དགོངས་ཏེ། བལ་པོའི་མཐིལ་དུ་བྱོན་ནས། པཎྜི་ཏ་ས་མནྟ་ཤྲཱི་ལོ་ལྔ། ཟླ་བ་བཅུ། ཞག་ལྔར་བར་ཆད་མེད་པར་བསྟེན་ནས། དབང་། བཤད་པ། མན་ངག་གི་བཀའ་རྣམས་ཞུས་ཤིང་། པཎྜི་ཏ་བོད་དུ་སྤྱན་དྲངས་ནས། རྒྱུད་འགྲེལ་པ་ཆ་ལག་དང་བཅས་པ་ཞུས་ཤིང་བསྒྱུར། གཏན་ལ་ཕབ། ཐམས་ཅད་ཀྱིས་བསྙེན་བཀུར་ཆེར་བྱས་ཏེ། ཉི་མ་གཅིག་ལ་གསེར་སྲང་སུམ་བརྒྱ་ཕུལ། སླར་སྐྱིད་གྲོང་བར་དུ་བསྐྱལ་བས་བླ་མ་ཡང་ཤིན་ཏུ་མཉེས་ཏེ། པཎྜི་ཏ་འབུམ་ཕྲག་གསུམ་པའི་པྲོག་ཞུ་དང་། ཆགས་ལྷམ། པཎྜི་ཏ་ཉིད་ཀྱི་ཕྱག་དྲིལ་དུས་འཁོར་ནས་གསུངས་པའི་ཚད་ལྡན་ཡང་གནང་ངོ་།།
ཡེ་ཤེས་སེངྒེ།
དེ་ལ་དེ་ཉིད་ཀྱི་སྲས་བླ་མ་ཡེ་ཤེས་སེངྒེས་གསན་ཅིང་། དེ་ལ་དེ་ཉིད་ཀྱི་སྲས་རྭ་འབུམ་སེངྒེས་གསན་ལ། དེ་ལ་བླ་མ་རྒ་ལོས་ཞུས་སོ།།
བླ་མ་རྒ་ལོ།
བླ་མ་རྒ་ལོ་ནི། བོད་ཀྱི་རྒྱལ་པོའི་དུས་སུ་བློན་པོ་དབའ་སང་ཤི་ཕོ་ཉར་བཏང་སྟེ། རྒྱ་ནག་ལས་ རྒྱ་ནག་གི་སྐད་བཙུན་པ་ ཧྭ་ཤང་སྤྱན་དྲངས་པ་དང་འབྲེལ་པར་མེ་ཉག་ མེ་ཉག་གི་སྐད་བཙུན་པ་ ཙེན་ཙེར་གྱུར་པ་ཞིག་ཀྱང་སྤྱན་དྲངས་ཏེ། རྒྱལ་པོའི་མཆོད་གནས་སུ་གྱུར་ཅིང་། སྔགས་འཆང་དུ་གྱུར་པའི་རྒྱུད་ལས། ཡར་འབྲོག་ཏུ་མེ་ཉག་གཞོན་ནུ་སྙིང་པོ་ཞེས་བྱ་བ་བྱུང་། དེའི་སྲས་གཞོན་ནུ་སེངྒེ། དེའི་སྲས་རིག་འཛིན་སྙིང་པོ། དེའི་སྲས་རྡོ་རྗེ་སེངྒེས་རོང་གི་མཁར་ཕུག་བཟུང་། དེ་ལས་སྲས་བཞི་བྱུང་བའི་གཅེན་པོ་ཡེ་ཤེས་རྡོ་རྗེ་ཞེས་བྱ་བ་གྲུབ་པ་བརྙེས་པ་ཞིག་བྱུང་། དེས་གྲུབ་ཐོབ་དབང་ཕྱུག་རྒྱལ་པོ་ཞེས་བྱ་བའི་གདན་ས་དབེན་དམར་བཟུང་ངོ་།།
རྗེ་བཙུན་རྒ་ལོ།
དེའི་སྲས་རྗེ་བཙུན་རྒ་ལོ་ནི། ཡབ་ཀྱི་མཚན་ལྟས་ལ་བརྟེན་ནས། སྔོན་གྱི་ཁམས་པ་རྒ་ལོ་ཙཱ་བའི་སྐྱེ་བར་དགོངས་ནས་མཚན་དུའང་དེ་ཉིད་བཏགས། ལོ་གསུམ་བཞེས་དུས་ཁ་ཆེ་པཎ་ཆེན་ངུར་སྨྲིག་ཏུ་བྱོན་པའི་ཚེ། མ་ཅིག་ཇོ་སྲས་སྐྱིད་མོས་བསྣམས་ནས། ཆོས་དང་བྱིན་བརླབས་ཞུ་རུ་བྱོན་པ་ལ། ཕྱག་གིས་བཞམས་སཾ་སྐྲྀ་ཏའི་སྐད་དུ་ལུང་བསྟན་ཅིང་དབུགས་དབྱུང་བ་མཛད་དེ། རྗེ་བཙུན་ཉིད་ཀྱིས་ཀྱང་། བྱིས་པའི་དུས་ན་ཁ་ཆེ་བའི། །བླ་མ་པཎ་ཆེན་ཉིད་དང་མཇལ། །མགོ་ལ་ཕྱག་གིས་བྱུགས་མཛད་ནས། །ལེགས་སྦྱར་སྐད་ཀྱིས་དབུགས་དབྱུང་མཛད།། ཅེས་གསུངས་པ་ཡིན་ནོ།། འདྲི་ཀློག་རྣམས་གཞོན་ནུ་ཉིད་ལ་མཁྱེན་ཅིང་། འཇིག་རྟེན་བསྟན་པ་དང་། ཕུང་པོ་ལྔའི་རབ་བྱེད་དང་། སྤྱོད་འཇུག་དང་། བག་ཆགས་དབྱུག་འདེད་ཀྱི་མན་ངག་ལ་སོགས་པ་ཡབ་ཀྱི་དྲུང་དུ་ཞུས་ཤིང་།