ཨེ་མ་ཧོ། རྒྱལ་པོ་ཆེན་པོ་བོད་ཀྱི་མི་རྣམས་ལ་ནི་དད་པ་མེད། བློན་པོ་ཆེན་པོ་རྣམས་ནི་ཆོས་ལ་གནག་པས། རྒྱལ་པོ་ཉིད་ཀྱི་ཆོས་ཀྱི་བཀའ་ཁྲིམས་དམ་པོ་དར་གྱི་མདུད་པ་འདྲ་བ་བཅའ་དགོས་པས་འཆོས་ཤིག་གསུངས་ནས། ལུག་གི་ལོ་གཞུག་ནས་སྤྲེའུའི་ལོ་གཞུག་ཡར་བཅད་ལ། སློབ་དཔོན་པད་མ་འབྱུང་གནས་དང་ཅོག་རོ་ཀླུའི་རྒྱལ་མཚན་གཉིས་ཀྱིས་གསང་སྔགས་ཀྱི་ཆོས་རྒྱུད་སྡེ་བཅོ་བརྒྱད་བསྒྱུར། །གསང་སྔགས་ཀྱི་ཆོས་སྒྲུབ་པ་ལ་བར་ཆད་མི་འབྱུང་བའི་ཕྱིར་གཟི་ལྡན་འབར་བ་མཚམས་ཀྱི་རྒྱུད། བདག་ཏུ་འཛིན་པ་འཁོར་བའི་རྒྱུ་ཡིན་པས་འཁོར་བ་ལས་སྒྲོལ་ཞིང་ཕུང་པོ་ལྷའི་དཀྱིལ་འཁོར་དུ་བྱ་བའི་ཕྱིར་ཞི་བ་ལྷའི་རྒྱུད། བདུད་དང་མུ་སྟེགས་ཚར་གཅད་པར་བྱ་བའི་ཕྱིར་སྐུའི་སྒྲུབ་ལུགས་བསྐལ་པ་མེ་ལྟར་འབར་བའི་རྒྱུད། གསུང་གི་སྒྲུབ་རྒྱུད་ལུགས་དབང་ཆེན་འདུས་པའི་ཏནྟྲ། ཐུགས་ཀྱི་སྒྲུབ་ལུགས་ཁྲོ་བོ་ཀུན་དྷ་རི་ཀའི་ཏནྟྲ། ཡོན་ཏན་གྱི་སྒྲུབ་ལུགས་ལྷ་མོ་མ་གོལ་པའི་ཏནྟྲ། འཕྲིན་ལས་ཀྱི་སྒྲུབ་ལུགས་རིག་འཛིན་འདུས་པའི་ཏནྟྲ། རིགས་སྔགས་ཀྱི་སྒྲུབ་ལུགས་ཧེ་རུ་ཀ་འདུས་པའི་ཏནྟྲ། འཇམ་དཔལ་སྐུའི་རྒྱུད་ཟླ་གསང་ནག་པོ། པད་མ་གསུང་གི་རྒྱུད་རྟ་མཆོག་རོལ་པ། ཡང་དག་ཐུགས་ཀྱི་རྒྱུད་ཧེ་རུ་ཀ་གལ་པོ། འཇིག་རྟེན་འདས་པའི་མདོ། བདུད་རྩི་ཡོན་ཏན་གྱི་རྒྱུད་བདུད་རྩི་རོལ་པ་ཆེ་ཆུང༌། ཕུར་པ་འཕྲིན་ལས་ཀྱི་རྒྱུད་བི་ཏོ་ཏ་མ་ལ་འབུམ་སྡེ། མ་མོ་སྦོད་གཏོང་གི་རྒྱུད་འབུམ་ཏིག སྲིད་པ་རྒྱུད་ལུང༌། ཕྲིན་ལས་ཁ་སྐོང་བ་དང་རྒྱན་རྟགས་འདེབས་པའི་ཕྱིར་ཤེས་པ་སྟོང་ཁས་བརྒྱན་པའི་རྒྱུད། ལས་རྒྱ་མཚོ་ཇི་ལྟར་བསྟན་པའི་རྒྱུད། ཀརྨ་མ་ལེ་འཕྲིན་ལས་ཀྱི་རྒྱུད། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱ་བའི་ཕྱིར་ཚོགས་རྒྱུད་ཆེ་ཆུང༌། མཆོད་པ་མི་ཟད་པའི་གཏེར་དུ་བྱིན་གྱིས་བརླབ་པའི་ཕྱིར་ནམ་མཁའ་མཛོད་བྱིན་གྱིས་བརླབས་པའི་རྒྱུད། སྒྲོལ་བ་གནས་སུ་དག་པར་བྱ་བའི་ཕྱིར་སྟོབས་ཆེན་ཡོངས་སྒྲོལ་གྱི་རྒྱུད། སྦྱོར་བ་གནས་སུ་དག་པར་བྱ་བའི་ཕྱིར་ཐིག་ལེ་ཀློང་གི་རྒྱུད། བརྟུལ་ཞུགས་དྲག་པོར་བྱ་བའི་ཕྱིར་གླང་པོ་ཆེ་རབ་འབོག་གི་རྒྱུད། བཀྲ་ཤིས་པ་ལ་སྦྱིན་བསྲེགས་བྱ་བའི་ཕྱིར་ཟ་བྱེད་རོལ་བའི་རྒྱུད། གཏོར་མའི་ལས་ཐམས་ཅད་ཀྱི་སྔོན་དུ་འགྲོ་བའི་ཕྱིར་གཏོར་རྒྱུད་ཆེ་ཆུང༌། བཀའ་འཁོར་སྐྱོང་བའི་སྲུང་མ་ལྷག་མ་ལ་དབང་བ་ལ་ལས་བཅོལ་བའི་ཕྱིར་དཔལ་འབར་ཁྲོ་མོའི་རྒྱུད། བགེགས་གཟིར་ཞིང་མནན་པའི་ཕྱིར་ཞིང་བཅུ་སྒྲོལ་བའི་རྒྱུད། དེ་རྣམས་ནི་མ་ཧ་ཡོ་གའི་རྒྱུད་ཡིན་ནོ། །ལུང་ཨ་ནུ་ཡོ་གའི་སྡེ་ལ་མདོ་བཞི་སེམས་དང་ལྔ་ལས་ཀུན་འདུས་རིག་པའི་མདོ། ཡེ་ཤེས་རྔམ་པ་སྲོག་གི་འཁོར་ལོ། དུར་ཁྲོད་ཁུ་བྱུག་རོལ་པའི་མདོ། སེམས་ལུང་ཆེན་པོའི་མདོ། སངས་རྒྱས་ཐམས་ཅད་ཀྱི་དགོངས་པ་འདུས་པ་ནི་བཀའ་ཐམས་ཅད་ཀྱི་དེམས་སུ་བཞུགས་པ་ཡིན་ནོ། །གསང་བ་སྡེ་དྲུག་ལ་སྐུའི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་རྣམ་སྣང་རྒྱུད་དྲ། འཕྲིན་ལས་ཀྱི་རྒྱུད་ཀརྨ་མ་ལེ། མཇུག་སྡུད་དོན་བསྡུས་པ་རྡོ་རྗེ་གདན་བཞིའི་རྒྱུད་དོ། །སྒྱུ་འཕྲུལ་སྡེ་བརྒྱད་ལ། སེམས་དང་ཡེ་ཤེས་རང་ལུགས་སུ་སྟོན་པ་གསང་བ་སྙིང་པོ། འཕྲིན་ལས་ཁ་ཚང་བར་བསྟན་པ་སྒྱུ་འཕྲུལ་བཞི་བཅུ་པ། དབང་མངོན་དུ་གྱུར་པ་སྒྱུ་འཕྲུལ་བླ་མ། དམ་ཚིག་དང་ལྟ་བའི་མན་ངག་ཏུ་གྱུར་པ་སྒྱུ་འཕྲུལ་ལེ་ལག དོན་བསྡུས་ནས་བསྟན་པ་སྒྱུ་འཕྲུལ་ལེའུ་བརྒྱད་པ། རོལ་པ་མངོན་དུ་གྱུར་པ་ལྷ་མོ་སྒྱུ་འཕྲུལ། དེ་ནས་མ་ཚང་བ་ཁ་སྐོང་བ་སྒྱུ་འཕྲུལ་རྒྱས་པ་བརྒྱད་ཅུ་པ། དོན་དམ་པ་ཡེ་ཤེས་སུ་བཤད་པ་འཇམ་དཔལ་སྒྱུ་འཕྲུལ་ལོ། །དེ་རྣམས་ནི་གསང་སྔགས་ནང་གི་རྒྱུད་སྡེའོ། །སློབ་དཔོན་པད་མ་འབྱུང་གནས་དང་ཅོག་རོ་ཀླུའི་རྒྱལ་མཚན་གྱིས་བསྒྱུར་རོ། །རྒྱ་དཔེ་རྒྱ་གར་ཤྲཱི་ནཱ་ལེན་དྲའི་གཙུག་ལག་ཁང་ནང་བཞུགས་པ་ལས། སློབ་དཔོན་པད་མ་འབྱུང་གནས་ཀྱིས་རྫུ་འཕྲུལ་གྱིས་བླངས་ཏེ། རྒྱ་གར་དུ་མ་ལུས་པར་རྒྱ་དཔེ་བསམ་ཡས་དཀོར་མཛོད་ནང་བཞུགས་སོ།