ངའི་གཉེན་ཟླ་ཁྱེད་མ་ཡིན་མོད་ཀྱི། འོན་ཀྱང་ཁྱེད་ཡོང་ཟིན་འདུག་པས་ཕར་ལ་སོང་ལ། ཁྱེད་རང་གི་རྒྱལ་པོ་ལ་རྒྱལ་པོ་བྱ་བ་ལ་མཆོད་གནས་དགོས་པ་ཡིན། ཁྱེད་ལ་ཆོས་མེད། ང་ལ་སངས་རྒྱས་འོད་སྲུངས་ཀྱི་སྐུ་རིང་ནས་སྐུ་གསུང་ཐུགས་ཀྱི་རྟེན་ཡོད་པས་བཟང༌། ཁྱེད་ཀྱི་མཆོད་གནས་སྐུ་གསུང་ཐུགས་ཀྱི་རྟེན་བཞེངས་པ་དང༌། དེ་བཞུགས་པའི་གཙུག་ལག་ཁང་བཞེངས་ནུས་ན་ངས་བུ་མོ་བཀས་གནང༌། དེ་བཞིན་མི་ནུས་ན་བུ་མོ་མི་སྟེར་གྱིས་ལ་དེའི་ལན་ཁྱེར་ལས་ཤོག་གསུངས་པས། དེ་ལ་བློན་པོ་མགར་གྱིས་ཁྱེད་བལ་པོ་དང་བོད་ཀྱི་བར་ས་ཐག་རིང་པོ་ལ། འཕྲིན་ཕར་སྐྱེལ་ཚུར་སྐྱེལ་བྱས་ན་ངེད་ཀྱི་ལྷ་གཅིག་སྤྱན་འདྲོངས་པའི་དུས་མི་ཡོང༌། དེ་ལ་རྒྱལ་པོས་གསེར་གྱི་སྒྲོན་བུ་འདི་བསྐུར་བ་ལགས་བྱས་ཏེ་ཕྱག་ཏུ་ཕུལ་བས། ཕྱག་ཏུ་བཞེས་ནས་ཁ་ཕྱེ་ནས་གཟིགས་པས། བལ་པོའི་ཡི་གེ་རུ་བྱུང་ནས་བཀླགས་ལཔས་རྒྱལ་པོ་བྱ་བ་ལ་མཆོད་གནས་དགོས་པ་ཡིན་ཁྱོད་ཟེར་ཏེ། ཁྱོད་སྟོད་ཀྱི་རྒྱལ་པོ་སངས་རྒྱས་འོད་སྲུངས་ཀྱི་རིང་ནས་སྐུ་གསུང་ཐུགས་ཀྱི་རྟེན་ཡོད་དེ་ང་ལ་མེད་ཟེར་ཏེ། ཁྱོད་ལྷ་གཅིག་གནང་ན་ངས་ཉི་མ་གཅིག་ལ་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས་ལྷ་ཁང་བརྒྱ་རྩ་བརྒྱད་བཞེངས་ཏེ། སྒོ་ཐམས་ཅད་ནུབ་ཕྱོགས་བལ་པོའི་ཡུལ་ལ་བསྟན་ལ་བཞག དེ་ངོ་མཚར་རམ་བྱ་བ་བྱུང་བས། བལ་པོའི་རྒྱལ་པོའི་བསམ་པ་ལ་འདི་རང་བདེན་ནམ་མི་བདེན། མི་བདེན་ན་ཁྱོད་པས་ང་བཟང་བ་ལ་བརྙས་བཅོས་རེ་ཆེ། བདེན་ན་ངས་ཁྱེད་མི་ཐུབ་སྟེ་ཐུབ་པར་དཀའ་བ་གཅིག་འདུག་སྙམ་ནས། ཡང་ཁྱེད་ཀྱི་རྒྱལ་པོ་དེས་ང་ལ་ཁས་ལེན་ཆེ་བར་གདའ་སྟེ། དེས་ཀྱང་མི་ཕན་རྒྱལ་པོ་བྱ་བ་ལ་ཁྲིམས་དགོས་པ་ཡིན་ཏེ་ཁྲིམས་མེད་པས། ངེད་ལ་འདི་ན་ཆོས་དགེ་བ་བཅུའི་ཁྲིམས་གཙང་མ་ཆོས་དང་མཐུན་པར་ཡོད་དེ། ཁྱེད་ལ་མེད། ཁྱེད་ཀྱི་ཆོས་དཀར་པོ་དགེ་བཅུའི་ཁྲིམས་འཆའ་ནུས་ན་བུ་མོ་སྦྱིན། དེ་མི་ནུས་ན་མི་སྟེར་གྱིས་ལ་ལན་ཁྱེར་ཤོག་གསུངས་པ་དང༌། དེ་ནས་བློན་པོ་མགར་གྱིས་ཁྱེད་བལ་ཡུལ་དང་བོད་གཉིས་ཀྱི་བར་དུ་འཕྲིན་ཕར་སྐྱེལ་ཚུར་སྐྱེལ་བྱས་ན་ས་ཐག་རིང་པོ་ལ་ངེད་ཀྱི་ལྷ་གཅིག་འདྲོངས་པའི་དུས་མི་ཡོང་བས་དེ་ལ་རྒྱལ་པོས་དངུལ་གྱི་བཀའ་སོག་སྒྲོམ་བུ་འདི་བསྐུར་བ་ལགས་སོ། །ཞེས་དངུལ་གྱི་སྒྲོམ་བུ་ཕྱག་ཏུ་ཕུལ་བས། ཕྱག་ཏུ་བཞེས་ནས་གཟིགས་པས་བལ་པོའི་ཡི་གེ་བྱུང་བས། རྒྱལ་པོ་ལ་ཁྲིམས་དགོས་པ་ཡིན་ཏེ་ཁྱེད་ལ་ཁྲིམས་མེད་ཟེར་ཏེ། ཁྱེད་དགེས་ཤིང་ལྷ་གཅིག་བཀས་གནང་ན་ངས་ཉི་མ་གཉིས་ལ་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས་ཆོས་དཀར་པོ་དགེ་བ་བཅུའི་ཁྲིམས་བཅའ། དེ་ངོ་མཚར་རམ་བྱ་བ་བྱུང༌། བལ་པོའི་རྒྱལ་པོས་སྙམ་ན། ང་བས་ཁོ་ཐུ་སྟེ་ལྷ་གཅིག་ཁྲི་བཙུན་ཁོ་ལ་སྦྱིན་དགོས། དེ་མ་བྱིན་ན་ཁོས་སྐུ་ལུས་ཀྱི་བཀོད་པ་འདི་ཙམ་སྤྲུལ་ནས་དཔག་དྲངས་ནས་ངའི་རྒྱལ་ཁམས་ཐམས་ཅད་འཇོམས། གྲོང་ཁྱེར་ཐམས་ཅད་བསྲེག ལྷ་གཅིག་ཁྲི་བཙུན་ཡང་རང་དབང་མེད་པར་འཁྲིད་དོ་སྙམས་ནས། ཐུགས་ཀྱིས་ནི་ལྷ་གཅིག་སྦྱིན་པར་ཐག་བཅད། ཞལ་དུ་ནི་མ་བཏོན་པར་བློན་པོ་རྣམས་བློ་བརྟན་མི་བརྟན་ལྟ་བ་དང་བརྟག་པར་བྱ་བས་ཡང་སྨྲས་པ། ཁྱོད་ལས་ང་བཟང་སྟེ། ཁྱོད་མཐའ་འཁོབ་ན་ཟས་དང་ལོངས་སྤྱོད་མེད། ང་ལ་སངས་རྒྱས་འོད་སྲུངས་ཀྱི་རིང་ནས་ད་ལྟར་བར་དུ་ཐབ་ཏུ་དུ་བ་རྒྱུན་མ་འཆད་པའི་ལོངས་སྤྱོད་ཀྱི་བྲེལ་བ་མེད་པ་ཡོད་པས་ཁྱེད་ལ་མེད། འདོད་པའི་ནོར་ལོངས་སྤྱོད་ལ་ལོངས་སྤྱོད་དུ་ཡོད་ན་ལྷ་གཅིག་སྦྱིན་གྱིས། དེ་མེད་ན་མི་སྟེར་གྱིས་ལ་ལན་ཁྱེར་ལས་ཤོག་གསུངས་པས། དེ་ལ་བློན་པོ་མགར་གྱིས་ཞུས་པ། སྔར་ཞུས་པ་བཞིན་དུ་ཁྱོད་བལ་ཡུལ་དང་བོད་གཉིས་ཀྱི་བར་དུ་ཐག་རིང་པོ་དེ་ལ་འཕྲིན་ཕར་སྐྱེལ་ཚུར་སྐྱེལ་བྱས་ན། ངེད་ཀྱིས་ལྷ་གཅིག་སྤྱན་འདྲོངས་པའི་དུས་མི་ཡོང་བས་དེ་ལ་རྒྱལ་པོས་ཟངས་ཀྱི་སྒྲོམ་བུ་འདི་བསྐུར་བ་ལགས་སོ། །ཞེས་སྒྲོམ་བུ་དེ་ཕྱག་ཏུ་ཕུལ་ལོ། །དེ་རྒྱལ་པོས་གཟིགས་པས་བལ་པོའི་ཡི་གེར་བྱུང་སྟེ། ཁྱོད་བལ་པོ་ལ་སངས་རྒྱས་འོད་སྲུངས་ཀྱི་རིང་ནས་ཐབ་ཀྱི་དུ་བ་རྒྱུན་ཆད་མ་མྱོངས་པ་ནོར་ལོངས་སྤྱོད་ཀྱིས་བྲེལ་བ་མེད། ངེད་མཐའ་འཁོབ་རྒྱལ་པོ་ལ་མེད་ཟེར་ཏེ།