ཁྱོད་དགྱེས་ཤིང་ལྷ་གཅིག་ཁྲི་བཙུན་བཀས་གནང་ན། ངས་ནངས་གཅིག་ལ་སྐུ་ལུས་ཀྱི་བཀོད་པ་བརྒྱར་སྤྲུལ་ལ་མིག་ཡུལ་དུ་གྱུར་པ་ལ་གཟུགས་ཀྱི་ལོངས་སྤྱོད་མི་འདྲ་བ་སྟོང༌། རྣ་བའི་ཡུལ་དུ་གྱུར་པ་ལ་སྒྲ་གླུ་དབྱངས་དང་རོལ་མོ་སིལ་སྙན་གྱི་ལོངས་སྤྱོད་མི་འདྲ་བ་སྟོང༌། སྣའི་ཡུལ་དུ་གྱུར་པ་ལ་དྲིའི་ལོངས་སྤྱོད་མི་འདྲ་བ་སྟོང༌། ལྕེའི་ཡུལ་དུ་གྱུར་པ་ལ་ཟས་རོ་མཆོག་གི་ལོངས་སྤྱོད་མི་འདྲ་བ་སྟོང༌། ལུས་ཀྱི་ཡུལ་དུ་གྱུར་པ་ལ་རེག་བྱའི་ལོངས་སྤྱོད་མི་འདྲ་བ་སྟོང༌། ཡིད་ཀྱི་ཡུལ་དུ་གྱུར་པ་ལ་ཚད་མེད་པ་བཞི། བྱང་ཆུབ་ཀྱི་ཆོས་སུམ་ཅུ་རྩ་བདུན་ལ་སོགས་པ་སྟོང་དུ་སྤྲུལ། གཞན་ཡང་སྐད་ཅིག་ཐང་ཅིག་ཡུད་ཙམ་གཅིག་ལ་འཛམ་བུའི་གླིང་གི་ལོངས་སྤྱོད་ཀྱི་གཏེར་ཁ་ཐམས་ཅད་ཁ་ཕྱེ་ལ་སེམས་ཅན་ཐམས་ཅད་ལ་བྲེལ་བ་དང༌། ཕོངས་པ་ཐམས་ཅད་བྲལ་བའི་ལོངས་སྤྱོད་མངའ་ཐང་ཆེན་པོས་སེམས་ཅན་ཐམས་ཅད་ཀྱི་དོན་བྱ་ལ་བདེ་བ་ལ་བཀོད་ལ་བཞག་གི་དེ་ངོ་མཚར་ཆེ་འམ་བྱ་བ་བྱུང་བས། དེར་བལ་པོའི་རྒྱལ་པའི་སྙམ་པ་ལ། མཐའ་འཁོབ་ཀྱི་རྒྱལ་པོའི་སྐུ་ལུས་ཀྱི་བཀོད་པ་དང༌། རྣམ་པར་འཕྲུལ་པ་ནི་བསམ་གྱིས་མི་ཁྱབ། བཀའ་སོག་སྒྲོམ་བུ་ཡང་ཐོགས་པ་མེད། སྙམ་ནས་དེར་ལྷ་གཅིག་ཁྲི་བཙུན་བཀས་གནང་ངོ༌། །དེར་ཡབ་རྒྱལ་པོས་ལྷ་གཅིག་ལ་ཁྱེད་བོད་ཀྱི་རྒྱལ་པོའི་བཙུན་མོ་ལ་འགྲོ་དགོས་གསུངས་པས། ལྷ་གཅིག་གི་ཞལ་ནས། ཕ་མ་དང་མིང་པོ་དང་མི་འཕྲད་པའི་ཡུལ་ཆོས་པ། གཉེན་དང་མི་འཕྲད་པའི་ཡུལ་དེར་ང་མི་འགྲོ་ཞེས་སྨྲས་སོ། །དེར་ཡབ་རྒྱལ་པོ་ན་རེ། དེས་མི་ཕན། ཁོང་སྤྲུལ་པའི་རྒྱལ་པོ་ཡིན་པར་འདུག ཁོ་ལ་སྲ་བརྟན་ནས་ཁྱོད་ཁོང་ལ་མ་བྱིན་ན། ཁོས་སྤྲུལ་པའི་དམག་མང་པོ་སྤྲུལ་ནས་ཁྱེད་དབང་མེད་དུ་འཁྱེར། ཡུལ་ཐམས་ཅད་འཇོམས་པལས་དེ་བས་ད་ལྟ་འཆམས་པ་རུང་ངོ་གསུངས་ཏེ། དེར་ཡབ་རྒྱལ་པོས་ལྷ་གཅིག་ཁྲི་བཙུན་མཐའ་འཁོབ་ཀྱི་རྒྱལ་པོ་ལ་བཙུན་མོར་གཏོང་ངོ་གསུངས་པས། མཐའ་འཁོབ་ཀྱི་རྒྱལ་པོ་དེ་དད་པ་ཤིན་ཏུ་ཆེ་བ་ལ་ལྷ་རྟེན་མེད་ཟེར་བས་ང་ལ་རྫོངས་སུ་ལྷ་གསུམ་སྐུར་ཅིག རྒྱལ་པོ་དེ་དབུལ་ཟེར་བས་རིན་པོ་ཆེ་གླང་པོ་ཆེའི་རྒྱབ་ཁལ་བདུན་སྐུར་ཅིག ཅེས་ལྷ་གཅིག་ཁྲི་བཙུན་གྱིས་ཞུ་བ་རྒྱལ་པོ་ལ་གསོལ་བས། རྒྱལ་པོས་ལྷ་གཅིག་ཁྲི་བཙུན་ལ་གནང་བར་དམ་བཅའ་ཁས་བླངས་པས། དེའི་མཆོད་གནས་སུ་སངས་རྒྱས་འོད་སྲུངས་ཀྱིས་རབ་གནས་མཛད་པའི་ཇོ་མོ་མི་སྐྱོད་རྡོ་རྗེ་དང༌། བྱམས་པ་ཆོས་ཀྱི་འཁོར་ལོ། རང་བྱུང་ཙན་དན་གྱི་ཇོ་མོ་སྒྲོལ་མ་གསུམ་གནང་ངོ༌། །རིན་པོ་ཆེའི་བང་མཛོད་ཁ་ཕྱེ་ནས་གླང་པོ་ཆེའི་རྒྱབ་ཁལ་བདུན་རྫོངས་སུ་གནང་ངོ༌། །གླང་པོ་ཆེ་གཅིག་སྨད་དུ་ལྷ་གཅིག་ཁྲི་བཙུན་ཆིབས་ནས་ཙན་དན་གྱི་སྐུ་ཕྱག་ཏུ་བསྣམས། སྟོད་དུ་ཇོ་བོ་མི་བསྐྱོད་རྡོ་རྗེ་དང༌། བྱམས་པ་ཆོས་ཀྱི་འཁོར་ལོ་བཞུགས་ནས། གླང་པོ་ཆེ་བདུན་ལ་རིན་པོ་ཆེ་བཀལ་ཏེ་མང་ཡུལ་གྱི་ཤིང་སྣ་ཚོགས་སྐྱེ་བའི་ཡུལ་ཞིག་ཏུ་བསྐྱལ་ནས་དེར་གླང་པོ་ཆེ་བརྒྱད་པོ་ཕྱིར་ལོག་གོ། །རིན་པོ་ཆེའི་ཁལ་རྣམས་རྟ་མང་པོ་ལ་བཀལ་ནས་ཡི་དམ་རྣམས་དང་ལྷ་གཅིག་ཁྲི་བཙུན་དང༌། མིའི་ནོར་ལ་དགའ་བ་རིན་པོ་ཆེ་རཏ྄ན་དེ་བ་དང༌། རྟག་ཤ་རཏ྄ན་དེ་བ་དང་བཻཌཱུརྱའི་ལྷུང་བཟེད་གསུམ་གྱིས་གཙོ་བྱས་པ་རྣམས་བློན་པོ་རྣམས་ཀྱིས་འབྲེང་སྐྱེད་བྱས་ནས་སྐུ་གསུམ་གྱིས་བྲག་དང་ཆུ་འཐབ་ཀྱི་འཕྲང་ལ་ཞབས་ཀྱིས་བྱོན། མང་ཡུལ་ནས་མཛོ་དང་དྲེའུ་གསུམ་གྱིས་སྤྱན་དྲངས། ཇོ་མོ་ཁྲོ་གཉེར་ཅན་གྱི་མཚན་ནས་བརྗོད་ཅིང་གསོལ་བ་བཏབ་ནས་བྱོན་པས། ལྷ་གཅིག་ཁྲི་བཙུན་དྲེའུ་དཀར་པོ་ཞིག་ལ་ཆིབས་ནས་ལྷ་སའི་མཐིལ་ལ་ཕྱགས་ཕེབས་པའི་ཚེ། རྒྱལ་པོ་དགའ་སྟོན་གྱི་གདན་སར་སྤྱན་དྲངས། དམར་པོ་རིའི་ཕོ་བྲང་དུ་རྒྱལ་པོ་དང་ཞལ་མཇལ་བའི་ཚེ་སྐྱེ་བོ་ཀུན་དང་ལྷ་མི་ཀུན་ལ་སྣང་བ་གསུམ་དུ་བྱུང༌། དེ་བཞིན་གཤེགས་པ་རྣམས་ལ་ཨརྱ་པ་ལོ་རྒྱལ་པོར་སྤྲུལ་པ་དང༌། ལྷ་མོ་ཁྲོ་གཉེར་ཅན་ལྷ་གཅིག་ཁྲི་བཙུན་དུ་སྤྲུལ་ནས་མཐའ་འཁོབ་ཏུ་ཆོས་དར་བར་བྱ་བའི་ཕྱིར་ཞལ་མཇལ་བའི་སྐུ་ལས་འོད་ཟེར་འཕྲོས་པས་ཕྱོགས་བཅུ་ནམ་མཁའི་མཐའ་ཁྱབ་པའི་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་སྐད་ཅིག་ལ་རྒྱུན་གཅོད་པའི་རྡོ་རྗེ་ལྟ་བུའི་ཏིང་ངེ་འཛིན་གྱི་མཛད་པ་བཅུ་གཉིས་ཀྱིས་རྣམ་པར་སྤྲུལ་པ་བསམ་གྱིས་མི་ཁྱབ་པ་གཟིགས་སོ།