da'ei steng du bzhad pa'i zhal gnyis/ de'i steng gtsigs pa'i zhal dmar po gnyis/ da'ei steng na 'dzum pa'i zhal mthing ga gnyis/ de'i steng na a mi de ba'i zhal dmar po gtsug tor dang bcas pa/ phyag bcu pa/ dang po gnyis thugs khar thal mo sbyar ba/ g.yas kyi gnyis pa na pad ma dkar po'i steng na sprul pa'i sku 'od dpag tu med pa/ gsum pa ru mda'/ bzhi po na 'khor lo/ lnga pa sa gnon mdzad pa'o/ /g.yon gyi gnyis pa na 'phreng ba/ gsum pa na nor bu rin po che/ bzhi par gzhu/ lnga pa na bum pa spyi blugs bsnams pa/ ri dwags e na ya'i stod g.yogs dkris pa/ dar sna tshogs kyi sham thabs bsnams par gzigs so/ /de nas bal po'i lha bzo ba la/ sku ni shin tu legs na 'di'i thugs kar mchod sdong 'di gsum dang / tsan dan sbrul gyi snying po'i sku rang byon 'di bzhugs pa yin pa la zhes bka' bstsal bas/ lha bzo ba na re/ sku 'di kho bos ma bgyis te dgung langs tsa na rgyal pos dga' ston mdzad pa dang rgyal po nyid la dris la 'bag bya'o snyam pa mchis zer ro/ /sku de shin tu g.yo bar gyur pa dang / phyag dang po gcig gis/ zhabs g.yon ma'i sham thabs pus mo'i gong du brdzes te/ zhabs mthil nas 'od byung ste tsan dan sbrul gyi snying po'i sku dang mchod sdong la phog pas/ de dag zhabs g.yas pa'i 'og tu nub nas/ thugs khar song ste der chags pa dang sa g.yos par gyur ro/ /lha rnams kyis nam mkha' dang mar snang la mchod pa byed do/ /sham thabs kyang de nyid du chags la sku de nyid shin tu sbram pa yin no/ /shin tu g.yo ba yin/ a mi de ba de g.yon du yo ba yin/ rgyal po thugs dgyes te ngo mtshar bar gyur to/ /kha ba can du sku bzhengs pa la de snga ba yin no/ /rgyal pos 'byung ba sa'i dgra bzlog pa'i phyir dbang phyug chen po'i ling ga dang / bya khyung ga ru Da'i rten dang / gza' rnams kyi mchod rten ser ru dang / rdo'i seng ge dkar mo yang mdzad do/ /de nas jo mo ru yong bzas brag phug ma mo nyal sar bcom ldan 'das rnam par snang mdzad kun tu zhal bzhengs su gsol lo/ /klu'i pho brang jo bo shAkyas mnan zin/ pho brang gi lho nub tu btsan gyi rgyu srang gcad par bya ba'i phyir mtshams bcad kyi mchod rten ke ru bzhengs/ de ma bzhengs na kha ba can gyi sgrub pa po rnams kyi srog btsan gyis 'phrog pas/ mchod rten de bzhengs pas rab tu byung ba la btsan gyi gnod pa mi 'byung ngo gsungs so/ /de nas gnam stong gi srod la rgyal po 'o thang gi mtsho 'gram du byon pa dang / lho phyogs gla ba'i tshal na lha 'dre rnams 'tshogs nas gros byed pa/ kha ba can 'di nged lha srin 'dre srin mi ma yin rnams kyis dbang ba yin pa la/ rgyal po srong btsan sgam po chos byed zer te/ sangs rgyas zer ba dang / chos zer ba la/ mi nad dang / phyugs nad dang / lo tog la btsa' dang / than pa dang / sad dang / ser ba dang / lo nyes gtong / 'jig rten du nyes dgu thams cad gtong / btsad po'i lha khang yang sngar bshig pa de legs so/ /da yang bshig par bya'o/ /de la yang rdo'i char dbab par bya'o/ /zhes zer te gyes nas song ngo / /de nas rgyal pos 'dre'i 'dun phung bshig pa'i phyir du/ jo bo thugs rje chen po la gsol ba btab pas jo bo bzhad pa'i zhal gnyis nas 'od zer byung nas rnam pa gnyis su song