de na de bzhin gshegs pa mi 'khrugs pa gtso 'khor dgu theg pa chen po'i chos kyi bgro ba mdzad cing bzhugs nas 'dug gtsang khang g.yas pa sgo phye tsa na/ de na de bzhin gshegs pa 'od dpag med gtso 'khor dgu dang bcas pa theg pa chen po'i chos kyi bgro ba mdzad kyin bzhugs 'dug yang gtsang khang g.yon pa sgo phye tsa na/ de na de bzhin gshegs pa byams pa chos kyi 'khor lo gtso 'khor dgu po theg pa chen po'i chos kyi bgro ba mdzad kyin bzhugs 'dug gtsang khang lho ngos sgo phye tsa na/ de na bcom ldan 'das mi bskyod rdo rjes 'khor gnod sbyin pho mo rnams la bod kha ba can gyi 'dre srin 'dul pa'i thabs ston/ de nas arya dzam bha la gter gyi bum pa gtod kyin bzhugs/ gtsang khang byang ngos sgo phye tsa na/ de nyams dga' ba sa gzhi gu yangs pa bya byed kyis mtho ba/ shing gi bzo legs par gzigs pa na nga'i lha'i bzhugs khang 'di la bya'o snyam ste phyir byon tsa na/ sgo'i them pa'i rtsar/ klu'i rgyal po sangs rgyas bcom ldan 'das sku mdog dkar po spyan dmar po gsum sbrul mgo nyi shu rtsa gtsig pas rgyal po'i zhabs la gtugs te phyag byas nas rgyal po chen po khyod kyi gtsug lag khang 'di stong chung ngu'i 'jig rten gyi khams su rgyas par bskyang gi/ nga'i gzugs gcig kyang gyis shig zer nas mi snang bar gyur to/ /de nas 'ben tshad gang tsam phyir byon tsa na/ klu'i rgyal po dga' bo sbrul mgo bdun pa gcig byas te/ rgyal po khyod kyi gtsug lag khang 'di stong bar ma'i 'jig rten gyi khams su rgyas par bskyang gi nga'i gzugs gcig kyang gyis shig zer nas mi snang bar gyur to/ /de nas byon pa dang klu nye dga' bos rgyal po la phyag byas nas khyed kyi gtsug lag khang 'di stong gsum gyi stong chen po 'dir ngas rgyas par bskyang gi/ nga'i gzugs gcig kyang gyis shig zer nas mi snang bar gyur to/ /de nas byon pa'i mdun du gnod sbyin gyi rgyal po na ga ku bhe ra mgo gsum pa zhig gis phyag byas te/ rgyal po khyod kyi gtsug lag khang 'di mi'i 'jigs pa las ngas bsrung gi/ nga'i gzugs gcig kyang gyis shig zer nas mi snang bar gyur to/ /de nas byin pa'i mdun du srin po'i rgyal po lang ka mgrin bcu mgo dgu pa gcig gis rgyal po la phyag bya te/ rgyal po khyod kyi gtsug lag khang 'di la me'i 'jigs pal byung na ngas bsrung gi/ nga'i gzugs gcig kyang gyis shig zer nas mi snang bar gyur to/ /de nas byon pa dang dri za'i rgyal po zur phud lnga pas rgyal po la phyag byas te/ khyod kyi gtsug lag khang 'di la mi ma yin gyi gnod pa byung na ngas bsrung gi/ nga'i gzugs gcig kyang gyis shig zer nas mi snang bar song ngo / /de nas zhal lhor gzigs pas dpal lha mos lcags kyi bre ba so gcu gnyis pa gcig thogs nas rgyal po la phyag byas te/ khyod kyi gtsug lag khang 'di la chu'i 'jigs pa byung na ngas bsrung gi/ nga'i gzugs gcig kyang gyis shig zer nas mi snang bar gyur to/ /gtsug lag khang mi ma yin pa rnams kyis bsrung bar khas blangs/ de nas rgyal pos kyang nangs par nyi ma shar tsam la dga' ston gyi rnga brdungs/ lha gcig khri matsun gyis dga' ston gyis shig blon pa rnams kyis lus rgyan dang chos las mchod pa rgyun mi chad pa spel zhing / ra sa'i gtsug lag khang du lha 'dren du shog cig