bod kyi rje/ /'jig rten dregs pa'i khengs sems can/ /nga rgyal 'khor bar skye ba'i rgyu/ /nyon mongs dug lnga'i rgyan gyis brgyan/ /bod kyi mnga' bdag lha sras la/ /khyed mnga' thang che ba glo ba dga'/ /rgyal po nyid la phyag mi 'tshal/ /rgyal po'i na bza' bzhes phyag 'tshal/ /zhes gsungs nas phyag g.yas pa deng mdzad pas rgyal po'i na bza' phyag gi 'od zer gyi zul rtser tshigs nas rgyal blon rnams bred de rgyal pos yab kyis phyag 'tshal lo/ /de nas slob dpon pho brang du spyan drangs nas gser khri la bzhugs su gsol/ zhal skyems dang bshos dang / 'jig rten gyi zhal zas sna tshogs drangs so/ /za 'og gi smug ber sku la gsol/ rgyal pos phyag rten dang bcas nas zhus pa/ e ma/ na mo ma hA gu ru rin po che/ /bdag ni gdong dmar srin po bod kyi rje/ /bod kyi mi ni gdul bar dka'/ /dam pa'i chos kyi rten gcig 'dzugs/ /slob dpon sprul pa'i sku bzhugs pas/ /ma rung lha srin 'dul du gsol/ /sa gzhi byin gyis brlab tu gsol/ /zhes zhu ba phul bas/ slob dpon gyi zhal nas/ bod kyi mnga' bdag rgyal po lags/ /bod 'di gnod sbyin pho mo'i yul/ /gnod sbyin lha srin dam la btags/ /'di na bod kyi klu rgyal yod/ /gsungs nas/ klu gdug pa can de la klu gter 'jug dgos gsungs te/ de nas mal gro'i mdar byon nas 'khor ba dong sprugs kyi cho ga mdzad/ /dpal ngan song sbyong ba'i dkyil 'khor zhal phye nas mnga' bdag rje 'bangs kyi sgrib pa sbyangs so/ /de nas mal gro gzi chen la klu gter bcug pas blang ba'i cho ga mdzad do/ /de nas has po rir byon te chab gtor gzi'i phor pa gang la brten nas/ ting nge 'dzin gyis bskyed nas byin gyis brlabs te/ slob dpon gyis lha 'dre thams cad zil gyis gnon lapa'i phyag rgya mdzad nas mgur bzhes pa/ hU~M nga ni pad ma 'byung gnas te/ /mngal gyi dri mas ma gos mtsho skyes rdo rje yin/ /lus la gnod pas mi tshugs rgyu lus rnam par dag /yo ga tshe yi rig 'dzin grub pa brnyes/ /nga'i lus ngag yid gsum lha ru gsal/ /'jig rten lha 'dre thams cad zil gyis gnon/ /'jig rten lha srin dregs pas sdigs su med/ /nam mkha' yangs pa'i dkyil 'khor du/ /'byung chen bzhi po shong yang shong / /shong yang shong de yangs kyang yangs/ /sems nyid stong pa dmigs med la/ /lha yang med de 'dre yang med/ /nga la cho 'phrul ci bstan yang / /nga la gnod pa rdul tsam med/ /mchod sbyin gtor ma rgya che 'di/ /mang por ting nge 'dzin gyis bskyed/ /so sor thob pa sngags kyis byas/ /phyag rgyas 'thab rtsod rgyal pham med/ /tshigs bcad bden pas bkram ste bsngo / /'di zhes sa gzhi gnang ba byin/ /khri srong lde btsan bsam pa sgrub/ /sngags 'chang nga'i bka' ma gcog /gum gum chum chum las la chums/ /lha khang rtsigs shig lha 'dre rnams/ /las la 'dus shig lha 'dre rnams/ /zhes gsungs nas mchod sbyin rgya chen po mang por bsngos te byin pas/ lha 'dre thams cad slob dpon gyi bka' 'og tu 'dus pas/ rma chen spom ra yong du ma nyan nas/ bdag ni dbyar khams shin tu che ba gcig lags na ban chung khyed kyi bka' nan che bas mi yong du ma btub pas 'ongs kyis/ da bka' ci stsol zhes smras pas/ slob dpon gyis kho la chab gtor rgya chen po 'di 'khyer la mnga' bdag gi 'dod pa sgrubs shig ban chung nga'i