sgron gyis khams gsum zangs khang gling bzhengs te 'og gzhi zangs la byas pa rgyal po'i thugs dam dbu rtse rigs gsum 'dra ba gcig bzhengs so/ /pho yong bza' rgyal mo btsun gyis bu tshal gser khang gling zhes pa/ bzo bo la zas sna mi 'dra ba bcu gsum drangs pa'i bzo sna khyad par can bcu gsum la/ phyi na gyang med pa bzo'i khyad/ nang na ka ba med pa bzo'i khyad/ rgya phibs kha phyir bltas dang nang bltas gnyis su yod pa bzo'i khyad/ gza' chen brgyad kyis ka ba 'degs pa bzo'i khyad/ rgyu skar nyi shu rtsa brgyad kyis gdung ma 'degs pa bzo'i khyad/ bya khyung mo'i sgo nga'i nang na lha mo brgyad khrus byed pa yod pa bzo'i khyad/ phyogs bzhi na gser gyi seng ge lug thong tsam bzhi yod pa bzo'i khyad/ gser gyi gdung ma la g.yu'i rta rgyugs pa yod pa bzo'i khyad/ g.yu'i gdung ma la gser gyi rta rgyugs pa yod pa bzo'i khyad/ mdzad pa bcu gnyis 'bur du dod pa bzo'i khyad/ g.yu'i sgo mo la gser gyi bye'u chung skad 'don pa yod pa bzo'i khyad/ gser gyi sgo mo la rus sbal gyi rgyab tu chu 'bab pa yod pa bzo'i khyad/ lha khang gi shing thams cad klu'i shing klag sha la byas bzo'i khyad lapar te de ltar bzo sna bcu gsum yod pa de bzhengs so/ /btsun mo 'bron bza' byang chub sman gyis lha khang dge rgyas bye ma'i gling bzhengs te/ de yang khong gis sras rgyal bu ma gzigs pas/ nga la bu med pas phyis lha khang zhig gsos byed mkhan mi yong zer te/ lha khang so phag gis brtsigs/ shing thams cad me yis tshigs nas mi yong zer nas klu shing klag sha la byas/ lha thams cad lugs mar byas so/ /mar me 'bul mkhan mi yong zer nas lha'i spyan thams cad me shel las byas so/ /yon chab 'bul mkhan mi yong zer nas lha'i spyan gyi gzigs sar chu mig byas so/ /me tog 'bul mkhan mi yong zer nas lha'i spyan gyis gzigs sar me tog ra bar byas so/ /de ltar lha khang dge rgyas bye ma gling bzhengs so/ /dbu rtse rigs gsum gyi phyogs bzhir rdo ring chen po re re'i steng zangs kyi khyi bo che re yod pa bzhengs so/ /de ltar gting nas bzhengs pa la 'jig rten gyi lha srin thams cad kyis brtsigs pas der nyin mo mis brtsigs pa las nub mo lha 'dres brtsigs pa mtho bar byung ngo / /de ltar rtsig pa tshar pa dang / shing dang rin po che dgos pa la/ der shing bzo mkhan pa rgya nag lang rtse he dang / bal po'i shing bzo ba sba su la sogs pas/ rgyal po'i mdun du rte'u klad la skor zhing / rgyal po lha khang rtsig pa shing la rdugs so/ /shing gang na yod byas pa dang / rgyal pos 'di tsam gyi gtsug lag khang gi shing dang rgyu rin po che gang nas btsal snyam pa'i thugs khral cher yod pa las/ de'i dus su slob dpon pad ma 'byung gnas kyis thugs dgongs pa la bzhugs te/ lha srin sde brgyad kyis lha rtsig grogs byas pas gtsug lag khang brtsigs zin 'dug pa la/ bod kyi lha 'dre gdug pa can rnams kyi lus ngag yid gsum dam la legs par thogs sam ma thogs snyam nas dgongs pa la bzhugs gzigs pas/ lha 'dre gzhan thams cad kyi lus ngag yid gsum dam la thogs nas/ lus dam la thogs nas bsam yas rtsig grogs byed kyi 'dug ngag dam la thogs nas rgyal po'i bsam pa bsgrub po zer zhing / slob dpon gyi bka' la nyan zer gyin 'dug