mchod pa yis/ /pad ma'i snying po bde bar gshegs pa'i brgyan/ /gsha' rtse nyi zlas brgyan pas nyin mtshan gsal/ /sra brtan mi 'gyur so phag baiDUrya/ /mthon mthing gser gyi ka ba ka gzhu la/ /rin chen sna tshogs phra dang spar kab mdzes pa btab/ /phyam gdung sgo glegs sgo dang phims la sogs/ /spar bkab phra yis thams cad khyab par bltams/ /dga' ldan lha yi khang pa mtshungs par bzhengs/ /gru skas ha res gshegs shul bde ba'i lam/ /seng ge stobs chen stod nas mchongs pa bzhin/ /tsan dan snying po'i khang bzang gzhal yas khang / /rnam thar sgo gsum rin chen gser gyis brgyan/ /gser gyi dril bu 'khrol ba'i skad sgra 'byin/ /rnam par snang mdzad rigs lnga kun gyi gtso/ /longs spyod rdzogs sku gling bzhi kun la brgyan/ /nye ba'i sras brgyad 'khor la 'dzum bag ston/ /skyil krung mnyam bzhag bzhugs la phyag 'tshal lo/ /phyogs bcu'i byang chub sems dpa' nyi shu bzhi/ /bdag lta ri bo nyi shu'i rtse mo nas/ /bsdu ba rnam bzhis 'gro don dgongs pa can/ /srid gsum sdug bsngal sel phyag 'tshal lo/ /sgo bzhi srung mdzad khro bo chen po brgyad/ /mi khom rnam brgyad ma lus 'joms pa po/ /'jig rten chos brgyad snyems dang byams pa mgon po dang / /dus gsum sangs rgyas khams gsum kun gyi gnyen/ /sku gsum snyem mdzad 'gro ba'i don mdzad pa/ /'jig rten gsum mchod khyed la phyag 'tshal lo/ /sa bcu'i byang sems chos kyi sprin la gnas/ /dpal bcu ldan pa kun nas byams pa'i thugs/ /pha rol phyin bcu spyod pa'i rnam dpyod can/ /byang chub sems dpa' bcu la phyag 'tshal lo/ /khro chen rnam rgyal nyon mongs bdud las rgyal/ /khams gsum rnam rgyal las kyi zhags pa gcod/ /ma rungs 'dul phyir rno ba'i mtshon cha bsnams/ /khro 'dzum pad ma'i spyan la phyag 'tshal lo/ /rang byung sprul pa'i skur ston mar me mdzad/ /lung bstan rin chen gser gyi 'od dang ldan/ /stong gsum dag dang sprul sku bye bas rgyan/ /'gro ba'i mun sel khyed la phyag 'tshal lo/ /mi mjed 'jig rten khams pa khyed la bstod/ /bskal pa bzang po'i byang chub sems dpa' bcus/ /stobs bcu ldan pa skye ba gcig gis thogs/ /'jig rten don mdzad khyed la phyag 'tshal lo/ /bstan pa'i 'khor lo bcom ldan mi g.yo mgon/ /bdud bzhi 'joms mdzad brkyangs bskums tshul gyis bzhugs/ /bcom ldan rdo rje gtum po stobs pa che/ /nyon mongs 'joms mdzad khyed la phyag 'tshal lo/ /bstan gnas bar du gtsug lag khang bzhugs shing / /me dang chu klung gnod pa mi 'byung zhing / /lha srin sde brgyad rtag tu gus mchod de/ /chos skyong srung mdzad rnams la phyag 'tshal lo/ /de ltar btsun mo gsum gyi las tshe spong bza' me tog sgron gyis khams gsum zangs khang gling dbu rtse rigs gsum dang 'dra ba gcig bzhengs/ pho yong bza' rgyal mo btsun gyis bu 'tshal gser khang gling bzo sna khyad par can bcu gsum yod pa gcig bzhengs/ 'brom bza' byang chub sman gyis dge rgyas bye ma'i gling bzhengs/ lha khang thams cad kyi rgya phibs ka gdung / ka gzhu lcam sgo glegs ru bzhi thams cad la gser gyi spar kab la/ nor bu rin po che'i phra bcug pa/ bzo dang bkod pa khyad par 'phags pa 'dzam bu gling na 'gran zla dang bral ba/ lha yul gzhan 'phrul dbang byed dang 'dra ba bzhengs