[A:14]
sul chen po'i bla ma 'jam dbyangs rin chen bzang pos/ sku mched gnyis gzigs pa'i dus su/ gcen po 'di byang chub rigs su 'dug nas sku tshe ring po mi yong / gcung po 'di gang zag khyad par can bstan pa dang sde chen po la phan thogs pa 'ong bar gsungs/ skyes bu mchog 'di gang la 'khrungs pa'i yum yang / rigs dang / ngang tshul/ spyod pa bzang zhing bsam sbyor thams cad dge ba sgrub cing gzhan la phan thogs pa/ shin tu bzang mor grags shing / g.yo sgyu la sogs bud med kyi skyon thams cad kyis ma gos pa/ yon bdag mo khang gsar zhes bya ba yin/ 'bri khung pa'i dgon pa rin chen grags na so phra mor yod pa las tshis byas pa dang / phyis dran bskul gyi yi ge bskur na mngon shes su byung ba'i gtam brgyud kyang yod/ lcam mo yang 'dzangs pa'i 'phrul dang / dge ba'i phyogs kyi yon tan du mas 'byor pa/ kun la phan par grags pa sras mo 'jom 'dzom 'bum zhes bya bas zhwa lur dge 'dun gyi sde chen po btsugs/ gtsug lag khag du glo 'bur gnyis/ gser sku chen po rnams/ rin po che'i bka' 'gyur/ rgya phubs la sogs dang / dge 'dun gyi zhabs tog // rim gro chen mo la sogs mdor na chos dang 'jig rten la phan pa'i bya ba bsam gyis mi khyab pa mdzad pa'ang byung ste/ lcam sring / yab yum khu mes brgyud bcas pa thams cad gang zag dam pa 'ga' zhig byung ba skyes bu chen po'i rigs yin no/ sdig can gyi rigs ni mthon por skyes kyang rigs mchog ces mi bya'o/ gzugs bzang ba rnams kyi mchog tu gyur pa ni/ sprul pa'i sku 'di'i dbang po dang nying lag thams cad skyon med cing tshad dang ldan pa/ kun gyis blta na sdug pa mdzes/