[A:15]
mthong na dga' la yid du 'ong ba/ mos gus zhen pa byed pa rnams la ni/ zhal bzhugs pa tsam gyis bag dro zhing byin chags pa la/ btang snyoms pa rnams kyis bltas kyang yid smon zhing gzi brjid che ba/ mtho 'tsham par 'dod pa gang gi kyang brnyas pa dang zil gyis mnan mi nus shing / bsod nams kyi stobs kyis gzhan thad zil gyis non pa/ gser gyi ri bo'i nyi ma'i dkyil 'khor ltar bzhugs pa yin/ yang dag par rdzogs pa'i sangs rgyas sam/ 'khor los bsgyur ba'i rgyal po la 'byung ba'i mtshan bzang po/ phyag zhabs 'jam zhing gzhon sha che ba dang / sku'i mdun mtho ba/ sor mo ring ba/ sku che ba dang / drang ba la sogs dang / dpe byad bzang po las/ sor mo zlum pa dang / rgyas pa dang / byin gyis phra ba dang / rtsa mi mngon pa dang / sku'i kho lag mangs shing bzang pa dang / sku zhum pa med pa dang / rgyas pa dang / phyag shing ltar 'jam pa dang / shangs mtho ba/ dbu rgyas pa la sogs rnams kyang che mthun du yod pa yin/ mdor na dpal 'byor gyi lus skyon med sdom pa gsum gyi rten mchog tu rung ba/ phun sum tshogs pa dang ldan pa yin no/ sdig pa byed pa'i lus la stobs dpal ldan pa drag rtsal che ba la sogs yon tan ci 'dug kyang gzugs mchog ci mi bya'o/ tshe ring ba rnams kyis mchog tu gyur pa ni/ da lta 'dzam gling pa'i tshe tshad drug bcu kha mar ral ba yin/ mdor na sku bltams nas ma gshegs bar du sdul ma myong / sdig pa mtshan nyid pa ma mdzad par bde skyid dang /