[A:༥༡ན]རྒྱལ་མཚན་རྣམས་བྱོན་ཅིང་། ཞང་བཙུན་ཡེར་བ་པ་ཡེ་ཤེས་འབར་ནི། རྗེ་བཙུན་བྱམས་པ་ལ་ཆོས་གསན་པར་གསུངས་ཤིང་། པོ་ཏོ་པའི་གནས་ཀྱི་སློབ་དཔོན་ཡིན་ལ། ཕྱིས་ཀྱི་ཞང་ཡེར་འབར་བ་རྟེན་སྐྱ་བོ་བླ་མ་ཞང་གི་བླ་མ་དང་མི་ཅིག་ལ། དེ་རྣམས་ཇོ་བོ་ཆེན་པོའི་ཐུན་མོང་མ་ཡིན་པའི་སློབ་མ་ཡིན་ནོ། །གཞན་ཡང་མར་པ་ལོ་ཙཱ་ལ་དབང་རིན་ཆེན་ཕྲེང་བ་གནང་། ཁྱུང་པོ་རྣལ་འབྱོར་ལ་སེམས་བསྐྱེད། བྱམས་ཆོས། བདེ་མཆོག གསང་འདུས། གཤེད་བསྐོར་དང་བཅས་པ་གནང་། མར་པ་དོ་བ་དང་། པུ་ཧྲང་ལོ་ཆུང་ལ་བདེ་མཆོག་གི་བསྐོར་རྣམས་གནང་། བ་རི་ལོ་ཙཱ་ལ་སྒྲའི་སྐོར་རྣམས་གནང་སྟེ། མདོར་ན་གངས་རིའི་ཁྲོད་འདིར་སྐྱེས་མཆོག་ཀུན་ལ་བཀའ་དྲིན་གྱིས་ཁྱབ་པར་མཛད་དོ། །ཁམས་ནས་རྣལ་འབྱོར་པ་ཆེན་པོ་དཔལ་ལྡན་དགོན་པ་བ། རྣལ་འབྱོར་པ་ཤེས་རབ་རྡོ་རྗེ། ཕྱ་དར་སྟོན་པ་དང་བཞི་ལ་ཁམས་པ་སྐུ་མཆེད་བཞི་ཞེས་གྲགས་པ་དེ་རྣམས་ཀྱི་ལོ་རྒྱུས་ཅུང་ཟད་བརྗོད་ན། རྣལ་འབྱོར་པ་ཆེན་པོ་འཁྲུངས་ཡུལ་མདོ་སྨད་ཙོང་ཁ་ཡོས་བུ་ལོ་བ། གདུང་རུས་ལུང་། མཚན་བྱང་ཆུབ་རན། ལོ་སུམ་ཅུ་རྩ་གཉིས་ལ་དབུས་སུ་བྱོན། ཇོ་བོ་དང་ཐོག་མར་མང་ཡུལ་བཟོར་གནས་སུ་མཇལ། ལོ་དགུ་བསྟེན། དཔལ་ལྡན་དགོན་པ་བ། མདོ་ཁམས་སྟོད་ཀྱི་ལྡན་མ་སྒ་པའི་སྒྲོལ་མ་ལྷ་ཁང་པ། གདུང་རུས་འཛེང་། འབྲུག་ལོ་པ། མཚན་དབང་ཕྱུག་རྒྱལ་མཚན། མདོ་ཁམས་ནས་དང་པོ་ཀཾ་པོ་རི་པ་བྱ་བའི་གྲུབ་ཐོབ་གཅིག་ལ་གཏད་ནས་བྱོན། མངའ་རིས་ན་པཎྜི་ཏ་བྱོན་འདུག་བྱ་བ་གསན་པས། ཇོ་བོ་དང་ཉ་མཚོ་གནས་