[A:༥༩ན]ཡིན་ཟེར་བ་ཡང་ད་ལྟ་བར་དུ་ཡོད་པར་གྲགས། འདི་ལ་སློབ་མ་གྲགས་ཆེ་བ། ཤ་ཕོ་སྒང་པ་དང་། འབན་ཚུལ་ཁྲིམས་རྒྱལ་བ་ཞེས་པ་སྐུ་ལུས་མ་སྤངས་པར་མཁའ་སྤྱོད་དུ་གཤེགས་པ་དང་། ཞོགས་སུ་འཁྲུངས་པ་སྡིང་པ་ཤེས་རབ་རྒྱ་མཚོ་དང་། ཞོགས་ཕུའི་ཀརྨ་བྲག་པ་རྒྱུན་དུ་བཟང་སྤྱོད་ལ་ཞལ་འདོན་མཛད་པ་ལ། ཆུ་ལེན་དུས་བདེ་བ་ཅན་གྱི་ཞིང་དེར་རབ་ཏུ་འགྲོ །ཞེས་པའི་སྐབས་སུ་མཁའ་སྤྱོད་དུ་གཤེགས་པ་སོགས། སྒྲུབ་པ་སྙིང་པོར་མཛད་པ་ཉི་ཤུ་ཙམ་བྱོན་ནོ། །སྤྱིར་སྐུ་མཆེད་གསུམ་གྲྭ་པ་ལ་རེས་སུ་ཆད་པ་མེད་པས། ཆོས་ཀྱི་འབྲེལ་པ་ལ་ཁྱད་པར་མེད་དོ། །དེ་ནས་པོ་ཏོ་བ་གཤེགས་པའི་གདུང་ཆ་ལྔར་བགོས་ཏེ། ཆ་གཅིག་དང་། ཐུགས་བཞུགས་པའི་དངུལ་གྱི་མཆོད་རྟེན་ཁྲུ་བཞི་པ་ཅིག་བྱས་པ། ཕུ་ཆུང་པས་གསན་པས། དངུལ་ལས་བྱས་ན་ངའི་གྲོགས་པོའི་གདུང་མ་འོངས་པ་ན་མི་ངན་གྱི་གྲོག་མོར་ཕུང་ངོ་འོངས་དོགས་འདུག་སྟེ། ད་བྱས་སྟིངས་རབ་གནས་ང་ལ་བབས་པས། དབྱར་རྒྱལ་གྱི་དོ་བོ་དགོན་པར་འགྲོ་བའི་ཞོར་ལ་བྱ་གསུངས་ནས་ཚུལ་ཁར་རབ་གནས་མཛད། ཁྱི་ལོའི་སྟོན་ཡུང་ངའི་ཕུ་ཆུང་དུ་བྱོན། བདུན་ཅུ་རྩ་དྲུག་བཞེས་པ་རྒྱལ་ཟླའི་ཉི་ཤུ་གཉིས་ལ་གཤེགས། ལ་ལར་པོ་དོ་དགོན་པར་གཤེགས་ཟེར་བ་ཡང་འདུག་གོ །བཤེས་གཉེན་པོ་ཏོ་བ་ནི། འཁྲུངས་ཡུལ་སྤྲས་བྲ་འོ་ཐང་། གདུང་རུས་གཉོས། ཡབ་སྐུ་བཤེན་སྲིད་ལ་དབང་ཕྱུག ཡུམ་མེ་མོ་བྱ་བའི་སྲས་སུ་མེ་མོ་ཡོས་ལ་འཁྲུངས། བྱིས་པའི་དུས་སུ་ཡབ་ཀྱི་མཆོད་གནས་མ་སྒོམ་བྱ་བ་ལ་སྒོམ་བསླབ་པར་ཞུས་པས། ཁོང་གི་ཞལ་ནས། ཐོས་པ་ཨེན་གཅིག་