[A:༦༧བ]བཅུ་གཅིག་ཏུ་ཆོས་གསུངས་པས་སློབ་མ་སྟོང་ཙམ་འདུས། དེ་ནས་མཐའ་ཕུར་ཟླ་བ་བརྒྱད་བཞུགས། ཁྱད་པར་གྱི་སྲས་སེ་སྤྱིལ་བུ་བ། རན་ཚན་རབ་ཀྱི་རྣལ་འབྱོར་བྱང་སེང་། རང་པོ་བོ་དྷི་ས་ཏྭ། དགས་པོ་ཉང་སོགས་དང་། ཡབ་སྲས་གཉིས་ཀའི་སློབ་མ་རྣལ་འབྱོར་བྱང་སེང་གིས་གྲོ་ས་དགོན་པ་བཏབ། གཞན་ཡང་ལྷོ་པ་ཐམས་ཅད་མཁྱེན་པ་སོགས་མང་དུ་བྱོན། བདུན་ཅུ་རྩ་ལྔ་པ་ལུག་ལོ་ཟླ་བ་བཅུ་གཅིག་པའི་ཚེས་ལྔ་ལ་མཐའ་ཕུར་གཤེགས། གདུང་བཞུ་བས་ཐུགས་ལྗགས་སོགས་བྱོན། གསེར་གྱི་མོ་ཏོག་གི་ཆར་བབས་པར་གྲགས་ཏེ། རྒྱས་པར་བློ་སྦྱོང་གི་བྱུང་ཚུལ་དང་། རྣམ་ཐར་ཆེ་ཆུང་དུ་བལྟའོ། །དེའི་ཁྱད་པར་གྱི་སྲས་སེ་སྤྱིལ་བུ་བ་ནི། འཁྲུངས་ཡུལ་ལྷོ་སྟོད་དེར་མ་སྒང་། གདུང་རུས་སེ། དགུང་སྙིང་གླང་ལོ་པ། རབ་བྱུང་དང་བསྙེན་རྫོགས་གཉིས་ཀའི་མཁན་པོ་ཆ་བས་མཛད། མཚན་ཆོས་ཀྱི་རྒྱལ་མཚན་དུ་བཏགས། བྱ་འཆད་ཁ་བ་དང་མཇལ། ཡུན་རིང་དུ་བསྟེན་ཅིང་། ཡོན་ཏན་བུམ་པ་གང་བྱོའི་ཚུལ་དུ་མཛད། སྔར་བྱ་འཆད་ཀྱི་ལུང་བསྟན་པ་བཞིན་འཆད་ཁ་གསར་མ་བཏབ། འཆད་ཁ་པ་ཆེན་པོའི་ནང་རྟེན་དུ་སྐུ་ལྡེར་རིན་པོ་ཆེ་དང་། ཕྱི་རྟེན་གྱི་མཆོད་རྟེན་ལ་སོགས་པ་བཞེངས་ནས་ཀླུང་ཤོད་དུ་བྱོན། སྤྱིལ་བུའི་དགོན་པ་བཏབ་སྟེ་རྣམ་གཡེང་སྤངས་ནས། སྟོད་དུ་མཁར་གོང་ལ་ག སྨད་དུ་ཉུང་ཞིང་སྣང་དུ་མཚམས་ཐོ་བརྒྱབས་ནས། ལོ་བདུན་དུ་མཚམས་མི་འདའ་མཛད། དེ་ནས་བྲག་དཀར་གནས་བརྟན་སོགས་ཀྱིས་སྤྱན་དྲངས་ནས་འཆད་ཁར་དགུན་ཆོས་ལ་བྱོན། གདུལ་བྱ་དུ་མ་སྨིན་པར་མཛད་ནས་དྲུག་ཅུ་རྩ་དགུ་པ་བྱ་ལོའི་