[A:67b]bcu gcig tu chos gsungs pas slob ma stong tsam 'dus/ de nas mtha' phur zla ba brgyad bzhugs/ khyad par gyi sras se spyil bu ba/ ran tshan rab kyi rnal 'byor byang seng / rang po bo dhi sa twa/ dgas po nyang sogs dang / yab sras gnyis ka'i slob ma rnal 'byor byang seng gis gro sa dgon pa btab/ gzhan yang lho pa thams cad mkhyen pa sogs mang du byon/ bdun cu rtsa lnga pa lug lo zla ba bcu gcig pa'i tshes lnga la mtha' phur gshegs/ gdung bzhu bas thugs ljags sogs byon/ gser gyi mo tog gi char babs par grags te/ rgyas par blo sbyong gi byung tshul dang / rnam thar che chung du blta'o/ /de'i khyad par gyi sras se spyil bu ba ni/ 'khrungs yul lho stod der ma sgang / gdung rus se/ dgung snying glang lo pa/ rab byung dang bsnyen rdzogs gnyis ka'i mkhan po cha bas mdzad/ mtshan chos kyi rgyal mtshan du btags/ bya 'chad kha ba dang mjal/ yun ring du bsten cing / yon tan bum pa gang byo'i tshul du mdzad/ sngar bya 'chad kyi lung bstan pa bzhin 'chad kha gsar ma btab/ 'chad kha pa chen po'i nang rten du sku lder rin po che dang / phyi rten gyi mchod rten la sogs pa bzhengs nas klung shod du byon/ spyil bu'i dgon pa btab ste rnam g.yeng spangs nas/ stod du mkhar gong la ga smad du nyung zhing snang du mtshams tho brgyabs nas/ lo bdun du mtshams mi 'da' mdzad/ de nas brag dkar gnas brtan sogs kyis spyan drangs nas 'chad khar dgun chos la byon/ gdul bya du ma smin par mdzad nas drug cu rtsa dgu pa bya lo'i