[A:༦༨ན]དབྱར་ཟླ་ར་བའི་ཚེས་བཅུ་གསུམ་ལ་སྤྱིལ་བུར་གཤེགས། འདི་ལ་སློབ་མའི་མཆོག་ལྷ་ཆེན་པོ། གྱ་ཡངས་པ་ཐང་པ། ཉན་ལྷ་ལྡིངས་པ་སོགས་མང་དུ་བྱོན་པ་ལས། ལྷ་ཆེན་པོ་ནི། ཡབ་ཇོ་བོ་རྣལ་འབྱོར། ཡུམ་སྣ་ནམ་ཟའི་སྲས་སུ་སྟག་ལོ་ལ་ཕོ་བྲང་ཁང་དམར་དུ་འཁྲུངས། དགུང་ལོ་བཅོ་ལྔ་ལ་རྒྱ་དུར་གྱི་མཁན་པོ་ཀླུབ་དཀར་དང་། གཙང་པ་ཁྱུང་པོ་ལ་མཁན་སློབ་ཞུས། བྱ་པར་རབ་ཏུ་བྱུང་སྟེ། མཚན་བྱང་ཆུབ་རིན་ཆེན་དུ་བཏགས། དེ་ནས་བྱ་འཆད་ཁ་བའི་སྐུ་འདྲ་གཟིགས་པས་དད་པའི་རྐྱེན་བྱས་ཏེ་དགེ་བཤེས་སེ་དང་མཇལ། ཆོས་མང་དུ་ཞུས། ཉི་ཤུ་རྩ་བཞི་ལ་རྒྱ་སར་སྒང་ནས་མཁན་པོ་རླན་སྤྱན་དྲངས་ཏེ་བསྙེན་པར་རྫོགས། གཞན་ཡང་ཁ་ཆེ་པཎ་ཆེན་ལ་སོགས་པ་མང་དུ་བསྟེན། སེ་སྤྱིལ་བུ་བ་གཤེགས་ནས། འཆད་ཁ་སྤྱིལ་བུའི་གདན་ས་མཛད། བཀའ་འགྱུར་གྱི་ལུང་བཞུགས་པས། ལྷ་ལུང་གི་དབང་ཕྱུག་ཏུ་གྲགས། སངས་རྒྱས་སྨན་བླ་སོགས་ཡི་དམ་མང་པོའི་ཞལ་གཟིགས་པ་རྣམ་ཐར་དུ་གསལ། འབྲུག་ལོ་བདུན་ཅུ་རྩ་ལྔ་ལ་འཆད་ཁར་གཤེགས། ལྷ་འགྲོ་མགོན་ནི། ཡབ་ཇོ་འབག་གི་སྲས་སུ་རྟ་ལོ་ལ་འཁྲུངས། ལོ་བཅུ་དྲུག་པ་ལ་འཆད་ཁར་ཁུ་བོའི་དྲུང་དུ་དགེ་བསྙེན་ཞུས། དེ་ནས་སྐྱུར་མོ་ལུང་དུ་སྦ་ཏི་ལ་རབ་ཏུ་བྱུང་སྟེ། མཚན་དབང་ཕྱུག་འོད་དུ་བཏགས། དེ་ནས་པོ་ཏོར་དགེ་བཤེས་གནས་བརྟན་ལ་མཁན་པོ་ཞུས་ཏེ་བསྙེན་པར་རྫོགས། ལྷ་ཆེན་པོ་གཤེགས་ནས་གདན་ས་མཛད། མི་གཡོ་བའི་གྲུབ་པ་བརྙེས་པས་སྟག་ཤམ་ཅན་དུ་ཡང་གྲགས། གདུལ་བྱ་མང་པོ་སྨིན་པར་མཛད་ནས་བདུན་ཅུ་རྩ་བཞི་པ་