[A:༧༠བ]་ཆེན་སྙིང་པོར་བཏགས། གཙང་ཕྱོགས་ལ་གཞོན་ནུ་ནས་མཚན་ཉིད་ཀྱི་སློབ་གཉེར་ལ་བྱོན་ནས། བླ་མ་སེང་གེ་སྒྲ་གཅན་འཛིན་བཟང་པོ་དང་། པཎྜི་ཏ་འབུམ་ཕྲག་གསུམ་པ་སོགས་མཁས་པ་མང་པོ་ལ་མདོ་སྔགས་ཀྱི་གསན་སྦྱོང་རྒྱ་ཆེར་མཛད། རྩོད་པ་ཡང་བཟང་། དེ་ནས་སྟོད་ལུང་ཐག་མར། དབུས་གཙང་གི་སྟོན་ཆེན་ཐམས་ཅད་འཚོགས་ནས་ཆོས་ཀྱི་བགྲོས་གླེང་འབའ་ཞིག་མཛད་པས། ཁོང་གིས་ཀྱང་གྲྭ་སྐོར་ལ་བྱོན། རྩོད་པ་མཛད་པས། ཀློ་ཀྱ་གཙོ་རྒན་བྱ་བས་ཉན་ནས། ཁོང་ན་རེ་བོད་དབུས་གཙང་གི་སྟོན་ཆེན་འདི་ཙམ་ཅིག་ཉིན་རེ་བཞིན་འཚོགས་ནས། མར་འཁོར་བ་ཡོང་ལུགས། ཡར་ཐར་པ་སྒྲུབ་ལུགས་ཀྱི་ཆོས་ཚིག་བཞི་པ་ཅིག་མེད་པར། ཀླད་པ་གས་གས་བ་གླང་དཀར་ཟལ་ལ་འཆི་བ་འདི་བྱུང་རེ་ཆེ་ཟེར་བ་གསན་པས། ཁོས་ཀྱང་དེ་ཙམ་ཅིག་གོ་འདུག་ན། ད་རྒྱ་གར་དུ་ཆོས་འཚོལ་བ་ལ་འགྲོ་དགོངས་ནས་བྱོན་པ་དང་། མཁའ་རུ་བའི་གྲྭ་བ་དགེ་སློང་སྣམ་སྦྱར་ཕྲག་པར་བཞག་པ་ཚུལ་ཁྲིམས་ཀྱི་དྲི་བྲོ་བ་ཅིག་དང་མཇལ་ཏེ། ཚེ་འདི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པ་མཚོ་ལ་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བགྱི། །ཞེས་གསུངས། དེ་སུས་མཛད་བྱས་པས། ཇོ་བོའི་གསུང་ཡིན་ཟེར། གང་ནས་བྱོན་བྱས་པས། མཁའ་རུ་དགོན་པ་ནས་འོང་ཟེར་བས། མཁའ་རུར་བྱོན། སྐྱབས་འགྲོའི་ཆོས་སྐོར་གསུངས་པ་གསན། དེ་ནས་མཁའ་རུ་བས་ལུང་བསྟན་ནས། ར་སྒྲེང་དུ་རྣལ་འབྱོར་པ་ཆེན་པོའི་སྤྱན་སྔར་བྱོན། ལྟ་བའི་དྲི་བ་མང་པོ་མཛད་པས།